Ngā kaupapa: Kapa Haka, Te Matatini

E ahu atu ana a Kataore ki Te Matatini me te tokomaha o āna rangatahi - Pūrongo Motuhake

Te Kāea
  • Waikato/Te Waiariki

Ko Kataore tētahi o ngā rōpū o Te Arawa kei te para i te huarahi ki te tuarua noa iho o āna whakataetae kapahaka ā-motu, arā ki Te Matatini i Ōtautahi.  Ko te nuinga o ngā kapa ka eke ki te papa-whakatūwaewae, ka kī kē i ngā kaihaka pakeke nei.  Engari anō a Kataore, ko ngā rangatahi kē kei te ārahi i tā rātou rautaki haka. 

I kōrero a Heeni Brown ki ētahi mema o te kapa i a rātou e whakarite ana mō te rā nui.

Hei tā George Haimona, "Ka kite rātou he oranga anō kei tua i ngā tiriti o te taone hoki atu ki tō marae hoki atu ki ō marae.  Tātou haere te mahi kapahaka kei reira tonu he āhuatanga tawhito engari he oranga anō mōu."

"Me kii kaare he tuakana teina, he ōrite tātou katoa ahakoa te pakeketanga," ki tā Te Tai o Rehua Cooper whakatau.

E ai ki a Riki Pihopa, "Ka tika me whāngai ki a rātou i tēnei ara kia kore rātou e whai i te ara kēnge, te mōmo tāhae, te rāwekeweke era momo."

Ki tā Cooper anō, "I konei ngā tuakana me kii hei awhi hei tautoko i ngā taiohi katoa kia pai tō rātou noho ki waenga i te rōpū."

"Ia tau, ia tau kua tekau te nui ō te hunga rangatahi e haere tonu ana ki te kura tuarua kua uru ki roto ki tēnei kaupapa, nā reira ko rātou kua āhua mataku kua āhua wehi pea ki te uru atu ki rōpū kē atu engari a Kataore ka powhiritia te hunga rangatahi katoa," e ai ki a George.

Ko te kōrero a Riki, "Ahakoa ko te ingoa ko Kataore he tipua he mokomokorea ehara tērā te āhuatanga ō tō mātou rōpū.  

Kia āhei te hunga mātakitaki ki te rongo ā taringa, ā wairua, ā hinengaro mō ngā kōrero katoa ehara nō Te Arawa waka anake engari nō roto o Aotearoa whānui.

Ko te kaupapa o Kataore mō tēnei tau ki te whakaatu atu i tētahi āhuatanga kaare anō kua kitea i ngā tau kua hipa ake.  Kia āhei te hunga te mātakitaki te maumahara i a mātou ehara mō ngā mahi kei waho kē i te pouaka.

Kia matua mōhio te hunga mātakitaki Kataore tērā te rōpū i mahi i tēnei i haria te hoiho ki runga i te atamira na kao.  Me pēhea a Kataore hei te wā ka rerekē ake i a rātou ka kite i Ōtautahi."

Hei tā Te Tai o Rehua, "Ko tāku e tino kōingo nei kia pakari ai tō tātou tū kia Pikiao tō tātou tū otirā ki a Kataore tō tātou tū koira noa iho."