Kaupapa: Housing

E 31 ngā whare otaota mō te Matau a Maui

Aroha Treacher
  • Te Tai Rāwhiti

Ko ngā whānau o Te Matau-a-Maui e noho pōkaikaha ana ki rō waka, ki rō mōtērā rānei kei te āwhinatia kia noho āhuru kē ki te mahana o ētahi whare ohotata hōu ki Ahuriri, ki Heretaunga hoki.

Mā pango mā whero e rite ai tēnei whare mā tētahi whānau hōu.

Ki tā James Lyver, nō te Te Taiwhenua o Heretaunga, ka whakauru mai ngā taonga ā-whare hōu kia āhuru mōwai te whare nei, ā, kōira tētahi aronga matua ā rātou.

Ko ngā whānau ka tonohia mai e Te Manatū Whakahiato Ora ka āhei te noho ki ēnei whare mō ngā toru marama. Ā, ka korowaitia rātou ki ngā ratonga maha, pērā i te hauora, te ako me te tiaki pūtea.

E mea mai a Hope nō Emerge Aotearoa, e iwa tekau ngā whānau i tā rātou rārangi e tātari ana mō tētahi whare otaota i te Matau a Maui, ā, he nunui tērā.

Ki tā James, he maha ngā whānau e noho apiapi ana ki rō waka, ā, mā ēnei whare otaota e noho āhuru mai rātou i roto i te wā o te hōtoke.

E waru ngā whare e rite ana ki te whakaruruhau whānau, ā he whare anō kei tua.

E ai ki a James, hei te mutunga o Hereturikoka oti ai ngā whare 23, nā kōna e 31 ngā whare mō ngā whānau i roto o Ahuriri me Heretaunga.

He hua tēnei nā te mahitahi i waenganui i te whare ratonga o Te Taiwhenua o Heretaunga me te roopu Emerge Aotearoa me Te Whare Huakina hoki.