Dreams now a reality for Ngāti Whātua ki Ōrakei‘s new homeowners

  • Tāmaki Makaurau

Kua rangatira te noho a etahi uri o Ngāti Whātua i te whiwhinga o a rātou kainga hou. No te rā nei, tokoiwa nga whānau i whai kainga hou i raro i te kaupapa o Kainga Tuatahi. Kei a Mania Clarke nga taipitopito.

He moemoeā kua rua tau e whaia ana.

“E tu ana taku whare i tenei wa, kare he kupu ake, tino makoakoa te ngakau,” hei tā Te Aroha Morehu no Ngāti Whātua, Ngāpuhi.

Ko Te Aroha Morehu me tōna whānau, tētahi o nga whānau e iwa i whai āheinga ki o rātou kainga hou. Heoi he wāhanga mahi ano māna hei kawe.

Hei tāna, “Nāku i waimaria i noho au i runga i te ahuru mowai o Tamaki Makaurau, ki au nei koinei te mahi a te kaitiaki.”

I te tau rua mano tekau ma toru i kōkiritia te kaupapa nei e Whai Rawa, koira te rōpu whakawhanake i nga rawa a te hapu. I kite ake rātou, e taea ana e nga uri te utu mōkete engari i te whai awhina moni tāpui.

“He roa te huarahi, he nui nga wero, ae he rahi te mahi, otira kei konei matou, kei te noho tonu,” hei tā Morehu.

Inaianei kua tutuki te pae tawhiti, ināianei e aro ana ia ki nga raru iti penei i te rahi o nga wāhi putunga.

“Ka ora tonu te mura o te ahikā, koira te mea nui mo te whanau. He tata ki te whanau, whakakotahi o matou whanau, kaore he roa te haere mo te awhina ia ratou,” hei tā Morehu.

Ahakoa no te Tarahiti te mana o te whenua, no nga whānau te mana o ngā whare heoi he whare ka hokona ki nga uri anake. I roto i nga tau tekau ma rima e heke mai nei, ka whai waahi nga kaipupuri te hoko atu ki te hapu, ki te Tarahiti rānei mo te mana hoko tuatahi.

Ka rongo ano te wairua hari nei e etahi atu uri o Ngati Whatua i te otinga o nga whare hou tekau ma waru hei te mutunga pea o tenei tau.