Kaupapa: Elections

Davis and Harawira to battle for Tai Tokerau seat

  • Te Tai Tokerau

E mea ana te mema o Reipa a Kelvin Davis, kua rite mai anō ia ki te taki i te wero ki a Hone Harawira mō te tūranga Mema Paremata mō te Tai Tokerau. Puta ake ana ngā kōrero nei, i a Harawira e mea ana, ka riro i a ia te turanga nei a te kōwhiringa pōti ko te heke mai.

Kāhore te mema paremata mō Te Tai Tokerau, a Kelvin Davis i te māharahara i te kōrero a Hone Harawira ka whakataetae ia i te tūru mō tō rāua rohe pōti.

E ai ki a Kelvin Davis, "Mohio ana te takiwa nei, e whakapau ana au i oku kaha, hei awhina, hei hapai i to tatou iwi Māori

I te Rāpare, i runga i te hōtaka a Kawe Kōrero, ka tuku atu te pātai ki te kaiarahi o Mana, mena hoki ka tō mai anō ia i te tūru o Te Tai Tokerau a te kōwhiringa pōti ko te heke mai.

E ai ki a Hone Harawira, “Tērā te hiahia o te iwi. Mena e tirohia ana au ki roto i te paremata, 25 ngā Māori i reira, ēngari ko wai, ko wai rātou mena e kore rātou e tū ana hei reo mō tō tātou iwi, hei reo mō te pani me te rawa kore. Ko tērā taku huarahi, ko tērā taku iwi.”

Hei tā Davis, "Ko te hiahia a Hone kia tineia i ngā raiti o mātou kei roto i te whare paremata, kia kaha ake te kaa mai i tōnā raiti, ehara tēnā e tika ana."

Kīhai te kaiarahi iwi ō te raki a Haami Piripi mō te whāki ake ko wai te tangata pai ki a ia, ēngari ka tuku tonu atu a Piripi i te pātai, he aha hoki ngā mahi i tutuki i a Harawira i a ia e tū ana hei Mema Paremata mō ngā nohonga paremata e toru.

Hei tā Piripi, “He aha ngā hua kua puta hei oranga mō te iwi? Na kei reira pea te tino rereketanga o Hone ki ētahi atu.  Mo Kelvin nei, ae, ka nui tana kaha te hoki mai, ki te iwi ki te kōrero, ki te rapu whakaaro, ki te rapu tautoko.

Ka mutu, i te tōngā o te rā, ko te tātāri whakamutunga kei roto i ngā ringaringa o Te Tai Tokerau a te kōwhiringa pōti ka tū a tērā tau.