Dancing with Māori Mythology

  • Tāmaki Makaurau

E ako ana ētehi tamariki kei ngā kura tuatahi o Tāmaki Makaurau i te mahi whakaari i ngā pūrākau Māori, mā ngā nekenekehanga o te tīnana me te kanikani. Ko Te Kura Kaupapa Māori o Ngā Maungarongo tētehi o āua kura. 

He wheako hou tēnei mā ngēnei tamariki, ara, te ako mahi whakaari i ngā pūrākau Māori mā ngā nekenekehanga o te tīnana me te kanikani.

E whakaako ana te rōpū kanikani o Atamira i ngā wānanga Kanikani i Ngā Pūrākau Māori, me te tautoko ā pūtea o Vodafone Events Centre i Tāmaki ki raro.  E whai whakaawe ana rātou i te pou whakaaro o Pou Kapūa.

Hei tā Matiu Hamuera nā teKamupene Atamira, “I tēnei wā ko te kaupapa, ko te pūrākau o Rata me tōna waka.  Ko te ngāko o tērā pūrākau mō ngā tamariki, ki te whai, te mihi, ki te whakamana i ngā hunga tiaki, ahakoa ko wai rātou.

Kua whā tau ngēnei momo wānanga e haere ana, ā, kei te wātea ki ngā kura katoa ki Tāmaki.  Ko tētehi o ngā whainga, kia noho Māori te reo Māori i a rātou e ako ana.

“I te tīmatatanga, i kite au i ngā tauira, e āhua ruarua ngā kupu Māori ō rātou, engari, i te mutunga o te kaupapa, tino maha ake ngā kupu hou i whakaako i a rātou,” hei tā Hamuera.

Ko Te Kura Kaupapa Māori o Ngā Maungarongo te kura reo Māori anake kua haere mai ki tēnei wānanga, ā, i te rua me te hāwhe haora, noaiho, kua hangāia e ngā tauira tā rātou ake kanikani nekehanga, hei whakaatu i te pūrākau a Rata.

E manako ana te rōpū kanikani o Atamiria, kia maha ake ai ngā wānanga nei i te tau, kia wātea hoki ai ki ngā kura katoa.