Kaupapa: Politics

Conflicts of interest may arise if Willie Jackson stands for Labour

  • Tāmaki Makaurau

Hei tā te Minita Whanaketanga Māori, hei tā Te Ururoa Flavell me heke iho a Willie Jackson i āna tūranga e tukituki ana ki ngā mahi kāwanatanga, ki te tū ia hei kaiwhakataetae mō te rōpū Reipa.  E whiriwhiri kōrero ana a Jackson ki te rōpū tōrangapū, ā, a kō ake nei te whakapuakanga puta ai. 

Kāore he aha ki a Te Ururoa Flavell, mēnā rānei ka tū a Willie Jackson hei kaitono mā te rōpū Reipa, wheoi, ka puta pea ngā raruraru mō te mātanga kaiwhakapāho nei.

“Ara anō ngā whāinga o tērā, kia kaua e noho hei kairipoata mō ngā take tōrangapū, engari, ara anō ngā tikanga o roto i ngā whiriwhiringa mahi.  Te tikanga ia me whai i ērā ture.”

I tohua tuatahi te kaitōrangapū o mua ki te poari o Te Mātāwai, nānā nei hoki te haepapa ki te whakarauora i te reo Māori, hei māngai mā te hunga noho taone.

“Ara anō ngā ture o Te Mātāwai.  Mēnā ka whiwhi i a koe tētahi tūranga e noho tukituki nei tō noho ki reira.  Ara te tikanga ia me puta.”   

Nō te tau iwa tekau mā iwa i kōwhiria a Jackson hei mema rārangi mō te Rōpū Alliance.  I tūmanako te Pāti Māori, ka tū ia hei kaitono mā rātou, me te rautaki e hoki ai te rohe pōti o Tāmaki Makaurau ki a rātou.

“I kōrero mātou i ngā wiki tata kua hipa, otirā ngā marama kua hipa ake.  Kua oti kē te wāhanga ki a ia, kua puta te whakaaro, me huri ki kaupapa kē, wāhi kē ki tangata kē.”

I mea mai te kaiārahi o te rōpū reipa a Andrew Little ki a mātou o Te Kāea,  e kōrero ana te pāti ki ngā kaitono maha, whērā i a Willie, ā, kāore anō ia kia whakatau mēnā āe rānei ka tū ia hei kaitono mō rātou.

I whakapā atu mātou ki a Jackson ki te kōrero engari, ka kī ia, hei te Rātapu kē ia e whakaputa korero.