Awanuiārangi Black's children vow to continue his legacy

Wepiha Te Kanawa
  • Waikato/Te Waiariki

Mātua rā i te kete pūrongo o Te Kāea, nō te rangi nei tukuna ai a Awanuiarangi Black ki te rua kōiwi o ōna mātua tūpuna.  Kei ngā mano te tokomaha o ngā tāngata kua rūmene atu ki tōna aroaro i Whetu o te Rangi Marae ki Tauranga i ēnei rangi e toru, ā, ko taua āhua tonu rā i te kawetanga ake o tōna waka ki Ōtūkōpiri urupa i tēnei ahiahi.

Ko Te Whetu o Te Rangi te whare e tū rā, ko te whetu o te whenua e takoto nei. Ko roimata me hupe hei hoa mō te whānau pani nei.

Hei tā Pouroto Ngaropo, “Ka whakapāhia te ihu o ona tama ki tōna ihu, arā, ko Kahotapu tēnā, arā ko Tawera tēnā, ko Uenuku, ko Wiremu, nō reira kei te ora tonu mai rā a Awanuiarangi ko rātou.”

Ko te Kotiate o tōna pāpa ki te ringa, ā, ko te mataamua a Kahotapu e kauhau nei i te ōhāki o tana matua.

“Ma wai e taurima? Mā ōna tama, ma ratou e kawe i te mana, te mauri, ma ratou e whakatutukihia ngā mahi kaore anō kia oti a Awanuiarangi,” hei tā Ngaropo.

Ko tā ētahi atu he kōrero mō tana taha ngāwari.

Hei tā Hauāuru Rawiri no Ngāti Paoa, “He tangata hātakēhī, maumahara au tetahi wā i nohonoho katoa ngā iwi katoa o Hauraki, ki te tepu. Raweke māua , i runga ano i te whakaaro ko te hohonutanga o nga whakawhitinga kōrero, ka whakamama ake i ngā korero i roto i te huihuinga.”

“Ahakoa rite nei koe ki to tupuna ki a Maui Tikitiki a Taranga, ko koe te pōtiki o tō whānau, engari kua kitea mai te whakatauiratanga mai o au mahi. Ngā pūmanawa ngā pukenga, i tutuki ai i runga i te ingoa o to iwi, Ngati Pukenga, arā Ko Awanuiarangi Pukenga, wānanga Pukenga korero, pukenga mo te mau taiaha o te whare tū tauā o Tūmatauenga,” hei tā Ngaropo

E ai kit e Minita Whakawhanake Māori a Te Ururoa Flavell, “Tērā pea, koira te tangata e whakakīkī i te whārua ka waihotia ake e au ki te whare paremata . Inā kē te taumata, o te whakaaro nui ki te tangata nei ki a ia.”

Awanuiarangi pūkenga o te moana, Awanuiarangi puna o te mātauranga.

“Taku hoa pū mau , tenei ka mihi atu ki a koe , haere atu koe, i tenei ra i tutukihia te ahuatanga o to moemoea, nau te moemoea inā koe ka mate ki roto i te upupā o Ōtūkopiri koe takoto ai, haere atu e moe,” hei tā Ngaropo.