Ngā kaupapa: Environment, Rena

Āwangawanga ana te iwi ki tā te Kāwanatanga e whakaae ana kia waiho mai he wāhanga o te Rena ki te take o Ōtāiti

  • Waikato/Te Waiariki

E tautoko ana te Kāwanatanga i te whakahau a te haukāinga o Tauranga, arā kia hikitia ake te kaipuke Rena, engari, kaua mō te kei o te waka, kei ngā wai hōhonu, kei te take o te Toka o Ōtāiti.

Ka mutu, he karere kawa tonu tēnei ki te māngai o Ngāi Te Hapū, o te motu o Motiti, i te mea, ko tāna, ko te Kāwanatanga tonu tērā, i takahī ana i āna herenga ki te Tiriti o Waitangi.

Ko te whakahau a te Kāwanatanga, me hiki ake te kei o te Kaipuke Rena me āna waihotanga kei te takiwa o te toru tekau mita i raro i te wai.

Nō te rā nei, puta ai te tono a te Kāwanatanga ki te tono taiao a te hunga nā rātou te Kaipuke Rena kia waiho te kaipuke ki te Toka o Ōtāiti.

Engari, kei te takiwā o te 70m a i raro i te wai, te  kei o te waka e takoto ana, ā, hei tā te Roia Matua o te Kāwanatanga, arā ngā whakatūpatotanga hauora, haumaru hoki, inā hutia ake.

Ko tā te Rōpu Whakamana i Te Tiriti o Waitangi, he taonga te toka o Otaiti ki te Māori, ā, i hē te kawenga o ngā mahi a te Kāwanatanga me te Māori e hāngai ana ki te Rena.

Hei tā Buddy Mikaere o Ngāi Te Hapū, o te moutere o Motiti, ko te āhua nei e huri taringa turi tonu ana te Kāwanatanga ki ērā whāinga.

I kapi ngā tono mō te tono taiao mō te Rena ka rongohia e te Kaunihera a Rohe o Te Moana Nui a Toi i tēnei rā, ēngari e matapaetia ana ka aro tonu atu tēnei kēhi ki te Kōti Taiao.