Auckland's Kings College Backs Kapahaka Rule Changes

updated
  • Tāmaki Makaurau

E tautoko ana tētahi kapa taitamatāne o Tāmaki Makaurau i ngā ture hou o te whakataetae kapahaka ā-motu o ngā Kura Tuarua.  Hei tā te kaiako mō te kapahaka o Ngā Kīngi, tā Lincoln Savage, he painga mō rātou, ka whakawāngia te wāhanga hou o te Mau Rākau ki Te Reo Māori.

Kua rima tau noa te kapahaka tamatāne o te Kāreti o Ngā Kīngi e whakataetae ana ki te papa tūwaewae.  Mai i tōna orokohanga, ko te mau rākau tōna tino.

Hei tā te kaiako tā Lincoln Savage, he rongopai ngā panonitanga, ka whakawākia te wāhanga mau rākau ki te reo.

“Mō mātou ake, he mea pai tēnei i te mea, kāore mātou i te mahi i te poi.  I roto i ngā whakataetae ā rohe nei, ko tō mātou kawe, he kawe i te māu rāka, hei tā Lincoln Savage, te Kaiako Kapahaka kei te Kāreti o Ngā Kīngi.

Nō tērā wiki te Kaunihera o Ngā Kapa Haka Kura Tuarua o Aotearoa i mea ake, ka kore te poi a ngā kapa tamatāne e whakawākia.  Ka riro kē te wāhanga mō te poi ki te mau rākau. 

Kei te aroha atu a Savage ki ngērā kapa ka pākia, “Mōhio nei mātou ki te mamae a wētahi atu kura, i a Hato Pāora.  Nō rātou kē te mahi poi, He rangatira, he tohunga rātou ki te kawe i tērā āhuatanga, nō reira, ka rongo mātou i te mamae.  I te mahi rātou i te poi nō mai anō.”

Nō tērā wiki i rongo ai rātou i te panonitanga o te ture, me te auē a te rahi.

E ki ana a Savage,”Kōrero atu au ki āku tama.  Me noho puku, me ōu whakaaro.  Kaua e whakaiti tangata, kaua e aha rānei.  Me whai aroha ki ngā mea e aue ana.”

E manako ana a Lincoln, ka whai whiringa ngā kapa ki tō rātou e hiahia ana, me te whiwhi ake ki ngā hua.