Kaupapa: Environment

Ākuanei puta ai te whakatau e pā ana ki te maina takutai tuatahi o Aotearoa

  • Te Tai Hauāuru

Kei te whakahē a Ngāti Ruanui me Ngā Rauru Kītahi i te tono a Trans Pacific Resources Ltd kia keri i ngā oneone ki te takutai o Pātea. Hei tā Melanie Nelson o Te Reo o te Taiao, ki te whakaaetia te tono e Te Mana Rauhī Taiao, ka raru te taiao o te moana me ngā Tamariki a Tangaroa pērā i te tohorā kikorangi e mōrearea ana.

Ākuanei ka mōhio a Aotearoa mehemea kua whakaaetia te mahi keri oneone takutai tuatahi.

Hei tā Melanie Nelson o Te Reo o te Taiao, “Kei reira ngā tini momo tohorā e noho ana, ā, ka tino raru ngā tohorā i te pāorooro nui. Nō reira me tūpato tātau ki te tiaki i ngā tohorā kei te raru haere rātou.”

Hei tā Debbie Ngarewa Packer, kei te whawhai tonu ngā iwi o Taranaki mō ngā taonga tuku iho, arā, te taiao.

Ko te wawata ia ka tino hangai te whakatau ki tā te hāpori titiro, arā, ko ēnei rawa o tātau he mea mō ngā uri whakatipu, ā, kei a mātau te kawenga hei kaitiaki kia ora tonu mai ēnei taonga mō ngā rā kei te heke mai, e mea ana a Packer.

Kua wetewetehia e Te Mana Rauhī Taiao te tono a Trans-Tasman Resources Limited kia whakaaetia te mahi maina i te takutaki ki Pātea, Taranaki. Hei tā Melanie Nelson, kia kōkiritia ngā mahi nei ka pā ngā wherū ki ngā uri katoa o te moana.

“Ko te para one ka puta mai ka pahū mai i te kiri ki te papa moana tētahi atu tino raru. Ka pā tērā para one ki ngā tini aitanga a Tangaroa e noho ana ki reira ki ngā āihe, ki ngā ika, ki ngā uri katoa a Tangaroa.”

Hei tā Debbie Ngarewa-Packer anō, ahakoa te whakatau, ka whawhai tonu rātau ki te tieki i te taiao.

Mō mātau ake, mehemea ka whakaaetia te tono ka mate mātau kia haere ki te kōti anō, e mea ana a Ngarewa-Packer.

Hei ngā rangi e heke mai nei puta ai te whakatau a Te Mana Rauhī Taiao.