Kaupapa: Kapa Haka

5 teams to represent Tāmaki Makaurau at Te Matatini

  • Tāmaki Makaurau

E rima ngā kapa ka whakakanohi mai i te rohe o Tāmaki Makaurau ki te whakataetae kapa haka ka tū a tērā tau. Nā wai, nā wai, he whakaeke miharo i puta i te rōpū nō te uru o Tāmaki, arā ko Te Taha Tū, kia eke panuku ai rātou ki te papatū waewae o Te Matatini.

He toki ki te mau rākau, koia hoki ko Te Taha Tū.

Hurō ana te hunga maatakitaki, a, tau ana rātou ki te tūranga tuarima.

Kīhai te Kapa Haka o Te Manu Huia i riro tūranga e tika ana i te whakataetae ā-rohe kua hipa, nā whai anō, ka hoki kaha mai rātou i tēnei tau.

Ko Moeahi Kerehoma rāua ko Kingi Makoare ngā kaitataki, a, whakawhiwhia ana te tūranga tuawhā ki a rātou.

He waiata o nāianei, o mua hoki i mahuta ake ki te pae.

I riro i Te Rōpū Manutaki te tūranga tuatoru. Ko te kaiwhakaū me te Minita Take Māori ō mua a Tā Pita Sharples te kaiarahi i te kapa i a rātou e waiata ana i tō rātou tira.

Whai muri i te ekenga o Ngā Tumanako ki ngā whiringa toa o Te Matatini, puta ana i te rōpū i takea mai i ngā tauira ō mua o Te Kura Kaupapa Māori o Hoani Waititi, he whakaaturanga miharo. I riro i a rātou te tūranga tuarua.

Engari ko ngā whakaihu waka o te whakataetae ā-rohe kua hipa, arā ko Te Waka Huia i puta hei toa anō i tēnei tau.