Ngā kaupapa: Kapa Haka, Te Matatini

$30,000 te rahi o ngā moni i kohia e Hātea kia tae atu ki Te Matatini

By Dean Nathan
  • Te Tai Tokerau

He haerenga tawhiti mā ngā kapa o Te Hiku o te Ika i tēnei tau kia tae ā-tīnana atu rātou ki Te Matatini.  Mai i Whangarei Terenga Paraoa kua pau kē te ono marama a te kapa o Hātea e kohi ana i te toru tekau mano tāra i hiahiatia ake kia ea ai tēnei haerenganui a rātou.  

Moe atu ara mai moe atu ara mai ko te papatūwaewae te tino kāinga mō te kapa haka o Hātea e whai huruhuru ai rātou kia rere atu ki Te Matatini.

E ai ki a Otene Hopa, “Ka tika rā, heoi anō i roto i ngā marama e ono nei, koira tā mātou mahi, te kohi moni, ā, ngā whakaaturanga o roto i te hapori, ngā mahi whakangahau.  Pīki mahi tēnā.  Engari koira te mea e ngākaunui ana ngā kaihaka nō reira i whakapau werawera ki te mahi i ngā mahi ana ka tutuki.”

He kapa rongonui mō tōna reo reka kua angitū a Hātea ki te waiata tira o Te Matatini i ngā tau kua pahure.  Kei reira tonu te aronga o ngā whakaaro.

Ki tā Hopa, “Arā te hiahia o te ngākau nē engari ko te mea nui ki roto i a mātou ko te hari i ngā mihi o Te Tai Tokerau ko te haria ngā kaupapa kia rangona ai te motu whānui ki ngā kaupapa nunui o te wā o roto o Te Tai Tokerau. Ko te haria hoki ngā mihi o ngā pakeke o konei ngā mihi o te iwi e noho nei i roto o Te Hiku o te Ika o Te Tai Tokerau.”

Iaianei e kaute ana ngā moe ki te wehenga atu i te kainga mō Te Matatini.  Kei te koa te ngākau me te hīkaka katoa o ngā kare a roto mō te whakaeke ki runga o Te Waipounamu. 

Hei tā Hopa, “Ko tā mātou, ā, kia kaha, kia ū.  Ki ngā kaihaka katoa o te motu, kia kaha, kia ū.  Ki ngā kaihaka o Te Tai Tokerau, tāria te wā ka huitahi ai tātou ki runga o Waitaha nō reira e mihi ana e mihi ana, e mihi ana.”

Tuaritia: