Ka parea pea ki rahaki ko Ngāi Māori e noho ana ki Ahitereiria

  • Ahitereiria

Te hanga nei, ka kore e puta he hua i ngā whakawhitiwhitinga korero ki waenga i a John Key me Tony Abbott mō Ngāi Māori e noho taumaha ana i raro i ngā ture toko i te ora i Ahitereiria.

Nō te rā nei hui ai a Key me ētahi māngai pakihi o Aotearoa ki te kāhui o Abbott i Poihākena.

He tūtakitanga harikoa ki waenganui i a John Key me Tony Abbott, engari me mau tonu i a John Key ana pūtea nā te mea, te hanga nei, ka raru tonu te hunga nō Aotearoa e noho ana ki Ahitereiria.

Ahakoa e tautoko ana āna minita i a ia, ki tā Key, ehara i te mea he mama noa te rongoā i ngā raru e pēhi nei i ngā uri o Aotearoa kei Ahitereiria.

I hui tahi ētahi māngai pakihi o Aotearoa me Ahitereiria, ā, i reira a Debbie Birch o Te Tumu Paeroa. I noho reo kore ngā iwi taketake o ngā whenua e rua.

Hēoi, mēnā ka waihotia tonutia atu te Māori ki waho, ka uaua mārika te anga whakamua i te ao ohanga.

Hei āpōpō hoki anō a John Key me tōna tira ki te wā kāinga, ā, ki te kore ngā mana o te hunga Māori o konei e whakaūngia, ka nui pea rātau ka hoki, ki te pērā.