Ngā kaupapa: Australia, Elections

Kei ngā Māori e noho ana ki Ahitereiria pea ngā pōti whai mana mō tēnei Kōwhiringa Pōti

  • Ahitereiria

E ai ki te tatau ā-motu o Ahitereiria mō te tau rua mano tekau mā tahi, kei kō atu i te kotahi rau, e toru tekau mano ngā Māori kei te Whenua Moemoeā e noho ana.

Ka āhei tonu te nuinga o rātou ki te tuku pōti i te kōwhiringa o Aotearoa e kainamu ana, me te aha, kei a rātou pea ngā pōti whai mana, ki te hiahia tuku pōti rātou.  Hei te Rāapa ka huakina ngā pōti o tarāwāhi.

He rangi mokopuna tēnei ki Poihākena, ā, tērā te haunga moni e āmio ana i taua takiwā.  Engari mō ētahi uri Māori he oranga kē te whiwhi.

Te Whenua Moemoeā, heoi mō ētahi Māori kua whenua ngutu kau kē.

E ai ki te minita o te whare karakia Māori i Redfern, he ahuru mōwai tēnei whare mō rātou e noho whakaraerae ana.

He tūao i ngā tiriti o Poihākena, e mōhio ana a Rawiri Iti, he wātene Māori, i ngā raruraru o te iwi Māori.  E tūmanako ana ia ka huri te tai.

I te tau rua mano tekau ma tahi, he rima rau tekau mā tahi noa ngā kaipōti o te rārangi Māori i tuku mai pōti i Ahitereiria, engari anō a Rawiri rāua ko Kaio e rite tonu ana te tuku pōti mai.

Pēnei i ngā uri Māori puta noa i tēnei motu, mō te whakaminenga nei, kei te poto haere te wā kia whai mōhiotanga ki hea whiua ai tō rātou pōti hei te rua tekau o tēnei marama.