Kua whakapāhotia e Marie Claire tētahi whakakitenga kahu Pākehā e mau moko Māori ana

  • Ahitereiria

Kua whakapāhotia e tētahi mōheni pueru nō Ahitereiria, tētahi pikitia e whakaatu ana i tētahi whakakitenga kahu Pākehā e mau moko Māori ana. 

Ahakoa kua puta mai tētahi kaihītoria mahi toi me te kī ake he mahi whakaparahako kē tēnei i te Māori, hei tā tētahi tohunga tā moko Māori, he akoranga kei roto i ēnei mahi.

Kua puta mai a Tākuta Ngarino Ellis o Te Whare Wānanga o Tāmaki Makaurau me te kī ake, he mahi whakaparahako te tuhinga o te moko, ki te uri Pākehā.

Ka mutu, mō te ringa toi moko nō Ngāpuhi, arā te hunga e kuare ana ki ā tātou toi Māori, ēngari arā hoki ngā huarahi hei whai mā te hunga pērā.

Ko Toi tērā, kua tuhi rā i te moko Māori ki te kiri o te tini o te hunga Pākehā, ā, i whai tūranga ia hei mātanga toi Māori mō te kiriata nui o Harirākau, a Ender Games i puta i tērā tau.

Kua whakapāha atu te mōheni o Marie Claire ki te marea, inā hika ake he nawe i roto i ētahi mō te pikitia.

Hei tā te mōheni, kīhai rātou i hanga, i utu rānei i ngā mahi, heoi anō, ko te pikitia he whakamihi i ngā mahi o te kaihoahoa pūeru, a Jean Paul Gaultier. 

Hei tā Toi, ehara i te mea me aukati rā ngā kēti whakapāho i ngā toi Māori ki te ao, ēngari me whai te hunga whakapāho ngā huarahi e puta tika ai ngā toi Māori ki te ao.