Ka tohe atu ngā kaiwhawhai BJJ Māori i te whakataetae Pan Pacific

Tamati Tiananga
  • Tāmaki Makaurau
  • Ahitereiria

He kapa nonoke BJJ tekau te nui nō te karapu o Oliver MMA ka rere atu ki Poipiripi hei te ata āpōpō ki te whakataetae Pan Pacific Jiu Jitsu.  Tūturu, kei roto i te kapa wahine, tāne hoki ētahi o ngā tino kaiwhawhai o Aotearoa nei.

He toa o te ao, he toa i te tauwhāinga BJJ Māori kua ngana mō te hemo tonu atu kia tū hei māngai mō Aotearoa mā te karapu Oliver MMA.

E ai ki te toa o te ao, ki a Hannah Oliver (Ngāti Porou), ko te whāinga kia whakatata mai ko te pae tawhiti kia whakamaua ai kia tata, ka mutu, ki Ahitereiria ka kitea ngā hua.

Ko tētahi atu i te kapa ko te toki tekau mā ono tau te pakeke, kaipupuri o te tātua kahurangi a Ethan Roots, ā, ko te hautipua nei, he tekau mā whitu tau a Jay Jay Wilson, nō te reanga tātua kahurangi anō ia.

Nā rātou anō te pūtea tautoko i kohi kia tū hei māngai mō Aotearoa, i kohia e ia tangata te kotahi mano, rima rau taara.

Ko ētahi atu i te kapa, ko te tātua pango nei a Lance Campbell rāua ko Sonny Te Wao, kaipupuri i te tātua kahurangi.