Ngā kaupapa: Australia, Elections

He karanga āwhina tā ngā Māori i Ahitereiria ki ngā kaitono Māori

  • Ahitereiria

He maha ngā Māori i Ahitereiria e hiakai ana ki ā tātou tikanga Māori, ā, kua noho ko ngā kapahaka me ngā akomanga Ataarangi hei wāhi huihui i te hapori, he hāpori kua kore e aronuitia e ngā kaitono Māori i tēnei kōwhiringa pōti.

He waimarie te hunga nei engari mo ētahi Māori i Ahitereiria, ko te rironga o to rātou taha Māori he mea motuhenga.

E rua tekau ngā tau kua noho a Louise Barber ki konei, ā, kua whai wāhi ia ki tētahi rōpū e wawata ana ki te whakatū marae ki te whakahonohono i ngā tāngata e noho ana ki Ahitereiria.

Hei tā Louise Barber, “Nā mātou te hunga tauhou mai ki Ahitereiria i āwhina, ki te rapu mahi, ki te whakatū pūtea moni, ki te whiwhi tiwhikete mahi.”

He kaipōti tonu a Louise, heoi ko tana hiahia kia kaha ake te tautoko mai i ngā kaitono Māori ki te pā kainga nei.

E mea ana a Louise Barber, “I haere mai ko Mana, ko te Pāti Māori, engari tē kitea i tēnei tau.  He kotahi rau rima tekau mā ono mano ngā Māori kei Ahitereiria nei, ā, he nui te wāhanga ka taea e mātou.”

Kāore anō pea o rātou wero e noho hei kaupapa matua i tēnei kōwhiringa engari mō te wā nei e kore to rātou whai kia ako ki te reo me ōna tikanga e memeha.