Ka tīmata te tukinga tuatahi 'State of Origin' a kō ake nei

  • Ahitereiria
Queensland takes on Blues with 7-yr streak under belt

Ka pau te whā haora ka tīmata te tukinga tuatahi o te huinga tākaro 'State of Origin', ā, ko te whakamutu i ngā hinganga katoa i ngā tau e whitu ki muri nei te whāinga nui o te kapa NSW ki te tira o Queensland.  Heoi, nā te wātea o ngā taniwha o te kapa waireti, o Johnathan Thurston rāua ko Darius Boyd ki te tākaro, ka uaua ake pea taua whāinga mā ngā Kikorangi.

Kāore e kore ka papahueke anō te huinga tākaro State of Origin i tēnei tau ahakoa i whakakorengia te rutu pokohiwi.

E whai ana te kapa NSW kia whakamutua te wairua toahanga o ngā tau e whitu, ā, tērā te matapae ka whai hua rātou i te tākaro ki te Taiwhanga Hākinakina o ANZ i Poihākena, tō rātou papa haukāinga.

Pērā i te tau kua hipa, e pā tonu ana te mamae ki te pona o te kāpene o te kapa Kikorangi a Paul Gallen.  

Kāore ia i tākaro riiki mō ngā wiki e whā engari kua nakawhiti ake ia i tēnei tau.

Nā te uru anō a Johnathan Thurston rāua ko Darius Boyd ki tētahi whakangungu a te kapa Queensland inanahi i māia ai te kapa, nā konā kei te rere ngā kōrero ātete.

Ahakoa tērā māiatanga me te rikoata a te tira Waireti nei, me hāngai pū rātou ki te tukinga, i te mea, kāore anō rātou kia wikitōria i te papa tākaro o ANZ mai anō i te tau rua mano, tekau.