Kaupapa: Te Reo Māori

Whakakotahi ai ngā kaiwhakapāho Māori ki te matapaki i tō rātau anamata

Talisa Kupenga

He kai-pāpāho Māori kei te piri ngātahi ki te whakapūmau i te reo me ngā kaupapa Māori i roto i ngā hurihanga o te ao pāpaho. Nā te Māngai Pāho te rōpū hou nei, a Te Pae Tawhiti i whakatū, kia hīkoi ngātahi i te ao o te hunga kiritaki, ina rā ko te hangarau kei ō rātou ringaringa.

He mahi tahi he ara hou kia ora tonu te ao pāpāho Māori.

Ko tā te Minita Pāpāho Māori a Nanaia Mahuta, "kua kite nga ahutanga ki a tatou nei rangatahi kei te whiwhi, kei te rapu o ratou nei ao i runga i te īpapa me te waea pukoro, te rorohiko. Ana kei reira e whakamahia ngā wahanga a te hunga pāpāho.

Ko te whainga kia whakakotahi ngā Kaihautu taratahi, te hunga kaituku pūtea me rōpū pēra i a Whakaata Māori, Te Reo Irirangi o Aotearoa, ngā reo irirangi Māori, Te Reo Tātāki ano hoki kia tū maia ngā hōtaka Māori ki ngā rōpū pēra i a Netflix.

Ko tā Mahuta “ki taku rongo kei te hiahia te mahi ngātahi; kua puta etahi o ngā āwangawanga ki te whakatinanahia tēra o ngā mahere me ki kia mahi tahi."

I roto i te rua tau, kei te takiwa o te tekau ma rua miriona tāra te pūtea o Whakaata Māori kua riro atu ki nga teihana auraki. Engari ko te whakatau a te Minita me mahi tahi ngā roopu pāpāhō.

Ko tā te Heamana o Te Māngai Pāho a Eruera Tarena “Ehara i te mea kei a mātou te mana tohu me aha. Ko te mea ke he tono, he patipati i runga noa i te aroha ki to tatou reo Māori. No reira ka pēhea to mātou mahi tahi? Ko mātou o Te Māngai Pāho he kaituku pūtea noa iho engari kei te ki atu ki te hapori kei te hiahia māotu ki te tautoko i te anga whakamua."

Ka tuku whakaaro nga mema tekau mā whā o Te Pae Tawhiti ki Te Māngai Pāho me pēhea te whakarauora i te reo te tuku pūtea hoki.