Kaupapa: Elections

Tokorua ngā tāngata e whai ana ki te tu hei māngai mā Reipa mo te tūru o Tāmaki

Kua mana te whai a Shane Taurima i te tūranga kai-tono mā te Rōpū Reipa ki te rohe pōti o Tāmaki Makaurau.

Nō te haurua haora kua hipa nei, kati ai te wā tuku ingoa, ā, kua whakapuakitia e Reipa ki Te Kāea, ko te pūkenga papaho tētahi kua hiki i te mānuka.

Tokorua raua kua tū te ringa hei kaitono ma te Roopu Reipa ki Tāmaki Makaurau, ko Shane Taurima tera, apiti atu ko Will Flavell.

Na mō te taha ki a Shane Taurima me whai whakawatea ia i te Rōpū Reipa i te tuatahi mona kaore i noho hei mema o te paati mō te kotahi tau i mua i te tuwheratanga mai o te tūru o Tāmaki Makaurau.

Heoi, e tika ana te kī ake he nui te tautoko ma Shane Taurima i waenga i te Rōpū Reipa, e toru ngā wā i whakatoroatia te aukatinga o te wahanga tuku ingoa nei kia mutu rāno i Te Reo Tataki o Aotearoa tana whakatewhatewha i ngā whakapae mona i a ia i te turanga tumu whakarae mō ngā hotaka Māori, Moananui-a-kiwa hoki.

He turanga i whakawāteatia e ia ao ake i ngā whakapae i whai waahi ana mahi mō te Rōpū Reipa ki ana mahi i Te Reo Tātaki.      

Ko ngā kōrero a Te Reo Tātaki ki Te Kāea, hei tēnei wiki tonu. Heoi, tōna tikanga ka whai kape o te purongo te hunga whai pānga ki ngā whakapae i mua i tona whakapuakitanga ki te iwi whanui, noreira, ko te whakaaro pea kua kitea e Shane Taurima me te whakatau ka taea tonu e ia tēnei mahi torangapu.

Na e pena ana aku kōrero i runga i te mohio i te tuwhera tonu a Reipa ki te whakatoroa ano i te wā aukatinga i te rangi nei, koia te take matua, engari auare ake.  

Ko Will Flavell tētahi, he taitāhake kei ona tau rua tekau, i pootingia ki te poari-a-rohe o Henderson-Massey i tera tau, koia hoki kei te upoko o te tari Māori ki te Kāreti o Rutherford.

Heoi, ko te ingoa e whakapapaki nei i a ngutu marea ko Shane Taurima, ā, e kore e roa ka tū te hui pooti i te kaiwikitoria - ma reira tatou ka kite ko wai ka hua ko wai ka tohu.