Tokoiti ake ngā mema o o tātou rōpu wawao kei te wehe atu

Aroha Treacher

Te āhua nei kua timu te tai mō Te Ope Katua o Aotearoa, mai i te wā i poroa rātou i te tau rua mano tekau mā tahi, i taua wā he kotahi mano whā rau ngā tūranga mahi i poroa, i kahakore te Ope Katua, kia penapena pūtea te take.

Heoi i tēnei tau, tokomaha ngā tāngata i piri tonu ki te Ope Katua, kei te pakari ināianei, otira, he mea uaua rawa te whai waahi atu.

Ko Tim Sciascia, he tekau mā waru ngā tau, tētahi o ngā tangata i eke ki te taumata o Te Ope Katua. Ka hono atu ia ki a rātou hei tērā Hanuera, hei kapi i te tūranga mahi System Combat Specialist.

Tokomaha ngā hoia ara ngā kanohi kei mua tonu o te rārangi pakanga, huhua ana ngā tāngata kua auraki mai, nā reira, kua piki ake te rahi o te Ope Katua ki te tekau mā whā mano ngā tāngata katoa.

Ahakoa kua heke ngā tatauranga o ngā hoia i wehe atu, kei Te Tauā Moana o Aotearoa te whakahekenga nui rawa, he tata ki te waru ōrau mai i te tata ki te tekau mā ono ōrau i te Pipiri i tērā tau, he nama kāore anō kia kitea e Te Tauā Moana i hītori mohoa.

He mea uaua rawa te whai waahi atu ki te Ope Katua i ēnei wā, ia tau he ono mano rima rau ngā tāngata i tono atu, heoi, he waru rau neke atu noa iho i whakaaetia. Ko te kore-nakawhiti tētahi o ngā raruraru nui.

Nā te torutoru o ngā tūranga mahi e waatea ana i Te Ope Katua, kei te kimi rātou i ngā ika pai, hei tū rangatira a-tinana a-hinengaro anō hoki. E tūmanakohia ana e Tim kia whakatutukihia e ia tōna awhero nui hei kairuku taiea o Te Tauā Moana o Aotearoa.

E ai ki ngā tatauranga, Ia tau mō ngā tau tekau kua horī, ko te nuinga o ngā tāngata i hono atu ki Te Ope Tauā. I tēnei tau he tata ki te waru rau i whai waahi atu, he toru rau neke atu i hono ki Te Tauā Moana o Aotearoa, he rua rau neke atu ki Tauaarangi o Aotearoa.