Kaupapa: Water

Te wero a te Kōti Matua ki te Kaunihera Māori

Rere ana te wero a te pae whakawā o te Kōti Matua ki te Kaunihera Māori i te rā nei, kia tohu mai he aha koa ngā hua kino o te hoko i ngā rawa ā-motu ka pā ki te iwi Māori, ā, ka pēhea e takahia ai te Tiriti o Waitangi. 

Ko te rā tuatahi tēnei o tā Te Kōti Matua whakawā i ngā tohe a te Kaunihera Māori hei aukati i ngā whāinga hoko rawa a te Kāwanatanga, kia aro tuatahi ki te mana o te Māori ki te wai.

E ai ki te roia mā te Kaunihere Māori, ki a Colin Carruthers QC, mā te hokotanga atu o ngā rawa, ka kore e taea e te Karauna, te tuku ara mā te Maori hei whakahaere i a rātou rawa wai. 

Kua inoi rātou ki te kooti, kia hanga whakapuakitanga e kiia ai, he hara te whakatūmataiti rawa, kia whakatinana rā anō te karauna i ētahi tikanga kua whakaaehia e te katoa, e tiaki ana i ngā mana o tēnā, o tēnā. Ka haere tonu te keehi āpōpō.

Kairīpoata:  Ripeka Timutimu