Ngā kaupapa: Water, Water

Te wai Māori - me whakahaere ā-rohe, me whakahaere ā-motu rānei?

Me whakarite Komihana ā-motu, me whai wāhi rānei ki ngā kaunihera ā- rohe? Koia te pātai mā Ngāi Māori mō te mana tohatoha i te wai, tētahi take nui ka tatū ake ki te aroaro o te Whare Pāremata i tēnei tau.

Mā wai te wai e tohatoha, mā wai hoki e whakamahi? Koia te pātai nui kei te ngutu e hāere ana mō te tohe ki te mana o te wai.

Hei tā Sir Toby Curtis, “Ka whakatūngia koe he kōmihana, kāore e kore ngā tāngata ka noho mai i tērā kōmihana, ehara nā rātou te wai. Mehemea ko Te Arawa te tangata ka noho mai ki tēnā kōmihana ko wai ia hei kōrero mō ngā wai o Ngāpuhi, mō ngā wai o Taranaki, Ngāti Porou.”

Ae mārika he rerekē ngā whakaaro a ngā taha e rua. Ko tā te Kaunihera Māori me whakatū kōmihana, ko tā te Kāhui Rangatira me noho tahi kē ki ngā kaunihera ā-rohe.

E ai ki a Sir Toby Curtis, “Kei te mihi anō ki te kaunihera Māori, engari katahi anō rātou ka puta mai me wēnā kōrero. Kua timata mātou i wēnei mahi e neke atu pea i te whā tau inaianei tērā kaupapa e whai ana.

Kāti, ahakoa ehara i te take matua, e whakaae ana hoki ngā rōpū e rua e tika ana kia kōrerohia te taha whai pūtea.”

Ki tā Sir Toby Curtis, “E hoko ana rātou i te wai ki a rātou anō ana ko tā mātou me āta noho tātou ki te kōrero i tērā taha ngā moni e pā ana ki te wai.

Hei tēnei tau kokirihia ai te wāhanga tuarua mō te tirohanga a Te Rōpū Whakamana ki te mana o te wai. Kua tata ki te toru tau ināianei nō te kawenga o te Kaunihera Māori i taua kēhi.