Kaupapa: Nelson Mandela

Te rata a ngā kaiārahi Māori ki a Mandela

Te Kāea

He tino tuatangata a Nelson Mandela ki nga tini tāngata me ngā iwi puta noa i te ao kua whakawhiua ki ngā mahi whakahāwea.

Nā āna mahi aukati i te whakatāuke tangata, i rata ai te tini ngerongero ki a ia.

I te tau iwa tekau mā rima ka tau mai te rangatira nei ki Aotearoa, ā, nā kona i tino pākia ai ētahi tino rangatira o te ao Māori.

I te tau iwa tekau mā rima i a ia e tū ana hei Perehitini mō Awherika ki te Tonga ka tau motuhake mai a Nelson Mandela ki Aotearoa. 

Ā, ka whakaeke atu ia ki Tūrangawaewae Marae i te taha o te Minita Māori o taua wā o Koro Wetere, i reira i kōrero tahi ai rāua mō ngā ōritenga i waenga i te Māori me ngā iwi Mangumangu. 

Hei tā Koro Wetere, "Kāore he tangata tū atu i a ia, i tae mai anō i mua i te ao Māori. he tino mihi ki tō tātou ariki me te ao Māori, koirā pea tētahi wāhanga i kite ai a ia ko Ngāi Tātou i roto i te moutere nei, e kaha nei ki te whai i ngā kaupapa o te ao Māori."

Ko Tākuta Pita Sharples tētahi i tū whakahē ki ngā whakahau a te Uniana Whutupōro o Te Tonga o Awherika e aukati ana i ngā kirimangu ki te tākaro, ā, ko Mandela tonu i pōhiri atu ki a ia, kia mihia ai ia mō tana tū. 

E ai ki a Sharples, "Tana kaha ki te tū i roto i te aroha ki ngā tangata mā."

Ko Hone Harawira tētahi e kore rawa e tuohu noa ki ngā taumahatanga o te wā, ā, ko tāna, ko tana rangawairua kia rangona ai tōna reo, kia hua ai he pai, ko Nelson Mandela tonu.

Hei tā Hone Harawira, "He ōrite te tangata nei ki a Ihu Karaiti, tērā taku kitenga, horekau he wheua kino kei roto a ia, he tangata aroha, i taku tūtakitanga ki a ia ka kitea au i tana wairua mahana, wairua mahaki, tōna hiahia kia manaakitia i te ao."

E taea pea tātou te kii ake ko ēnei rangatira Māori i whai takiwā ki te ata o tēnei rangatira o te ao whānui e poroporoiretia nei.