Ngā kaupapa: Entertainment, Raggamuffin

Te rārangi rōpū waiata mō te konohete nui o Raggamuffin 2014

Wepiha Te Kanawa

E toru rā noa e toe ana kia tū ai te konohete nui o Raggamuffin hei mirimiri i a Ngāi Taringa Rahirahi ki ngā oro reggae.

Ā, e hia kē ngā toki waiata nō konei, nō tāwāhi anō ka whakangahau i te mātinitini ka pōī atu ki te papa o Rotorua.

Ko Raggamuffin te tūrangawaewae o ngā waiata Reggae o Aotearoa nō tōna orokohanga i te tau rua mano tekau mā waru.

Heoi i tēnei tau kua kaha pēhi te marea i te māngai tautoko a Whakaata Māori kia maha ake ngā manutīoriori nō tua-ā-rangi.

Ko Common Kings tērā kātahi anō ka tau mai ki Aotearoa ka tū ki te papa tū waewae.

Ko te hunga nō Hawai'i hoki a Rebel Souljahz ka tū ki te whakangahau.

Ko ngā uri o te Tai Tokerau a Soljah ka waiata i tēnei tau.

Ko House of Shem rātou ko Three Houses Down, ko Sons of Zion hoki ērā kei te rārangi ingoa.

Ka tū hoki ngā korokoro tui maha o Aotearoa Reggae All Stars ki te whakaatu i tā rātou whakahōutanga o "Sensitive to a Smile".

Hei āpōpō, he uiuitanga motuhake tā Te Kāea me ngā manuhiri nō Hawai'i, arā ko Rebel Souljahz.