Kaupapa: Te Matatini

Te Matatini - Te Kei

E mōhio mārikatia ana, ko Te Pou o Mangatawhiri tētahi rōpū e aruaru ana i tōna whiringa toa tuarua, ā, hei tā tētahi o ōna kaihaka, “I tēnei wā kua tino pau te hau, engari ko te hiahia, ko te manako, kua tutuki, kua ea ngā mahi i te atamira”.

Ka tau mai a Tūhourangi-Ngāti Wāhiao, ka rongo mārika te minenga i te waitī me te rōreka o ngā reo. Ko tā Tahangawari Tangitu-Huata o te rōpū nā, “Hīkaka katoa. Hīkaka katoa te ngākau nā te mea he kaupapa tino whakahirahira a Te Matatini ki konei ki Te Arawa”.

Whai muri iho, ko te hokinga mai o ngā puhiariki o te whakataetae. Ko tā te tira a Wetini Mitai Ngatai, ko tā Te Mātārae I Ōrehu he whakatairanga i ngā kōrero ake o te takiwā, ā, ko te aroha o Hinemoa rāua ko Tūtanekai tērā i waiatahia.

Ko Rūātoki te tuatahi o ngā rōpū e toru e whai hononga ana ki Mataatua i tū i te rā nei.

Ko Te Ahikōmau o Hamo Te Rangi tērā i tuku mihi atu ki tā Te Arawa hāpai i te kaupapa whakatōpū pūtea, Te Rū o Te Manawa. Ko tā te kaitātaki tāne o te kapa, ko tā Tauira Takurua, “Kei te haere tonu tēnā āwhina. Kei te haere tonu ngā pouritanga kei roto i ngā whānau, nā te mea karekau he whare. Karekau he whare – me pēhea rā, me pēhea rā?”

Āe mārika, kua rua rā rawa ngā mātanga e mea ana, ko Te Kei tonu te puna o te mate, erangi nō te rā nei, ko te kapa haka ka puta, ka ora.