Ngā kaupapa: BUDGET, Entertainment

TAHUA 2017: Te Ō Kiriata

Tepara Koti

Neke atu i te toru rau miriona kua tohua ki te Ō Kiriata hei hāpai i ngā kiriata nō konei me ērā nō tāwahi ka whakaāhuatia ki te Aotearoa nei. Tērā te karanga o ngā ringa whero Māori kia rahi ake taua āwhina hei tautoko i ngā tono katoa kei mua i te aroaro.

E rongonuitia whānuitia ana ngā pikitia me ngā mata Māori huri noa i te ao kiriata. Ahakoa tērā, ko te nuinga tonu o ngā huruhuru kiriata ka rere atu ki tāwāhi.

Hei tā Ngā Aho Whakaari, te Ohu Kaimahi Māori o te Ō Kiriata, e tika ana kia rahi ake te pūtea tautoko, heoi, he mea nui hoki kia whai mana a Ngāi Māori ki te tēpu whakahaere.

E mārama pū ana te kaupoai o Te Whānau-a-Apanui a Taika Waititi ki ngā tono nō tāwāhi mō ngā ringa whero Māori, nā te nui o ngā mahi kei a ia i tēnei wā.
Heoi o ngā kiriata whai rawa e rima o Aotearoa, koia tonu te kaihautū mō ngā kiriata e rua kei te pae.

Hei tā te kaitaki kiriata o Poi 360, he whitiāhua ā-tihi, tā Lanita Ririnui-Ryan, he puna pūtea mutungakore ka hiahiatia kia ea ngā mahi auaha. Heoi me wāwāhi taua pūtea kia tika hei tautoko i ngā whanaketanga kei te aroaro.

Kei tūpono ka tae mai te kiriata tuarua o Avatar ki Aotearoa me te tū a te uri nō Te Arawa waka a Cliff Curtis hei kaiwhakaari matua, tērā te karanga o ngā ringa whero Māori kia aro mai te Kāwanatanga ki ngā mahi kiriata me ōna hua katoa i Aotearoa nei.