Kaupapa: Crime

Ohorere ana tētahi kaipoitūkohu nō Tāmaki mō ngā pupuhitanga i te Whare Wānanga ki Oregon

E ai ki ngā whakamārama ki a Te Kāea, kei te whakarite tētahi kōkā o Aotearoa ki te rere ki Amerika, ki reira piri atu ai ki tāna tama i kite ā kanohi i te pupuhinga pū i tētahi whare wānanga ki Oregon.

He pūkenga poitūkohu te tama Māori Hāmoana nei a Jaylen Gerrand nō Tāmaki Makaurau i rongo i te pakō o te riri i tētahi parekura anō ki te pū.

Ko te whainga o te iti kahurangi tērā kua huri pea hei moepapa weriweri mō Jaylen Gerrand.

Tekau ngā tāngata kua mate, tokowhitu kua whara i ngā kariri a tētahi kaipuhi i te ata nei. I puta te aitua nei ki Te Kura Kareti o Umpqua, Roseburg, i te takiwa o Oregon i Amerika.

Ko te kaiako o te Kapa Poitūkohu Supercity Rangers a Jeoff Green tērā i taunaki te nōhanga a Gerrand ki te Kura i reira e toru wiki ki muri. I tumanakotia kia rere atu te tamaiti a Green rāua ko tētahi atu kaitākaro poitūkohu a te wiki e heke mai nei.

Kīhai te whāea o Jaylen a Monette i whakaae kia kōrerō ki te ao pāpāho, ēngari e mārama ana a Te Kāea ka whiriwhiri ia mena ka noho tonu tana tamaiti ki Amerika a te wā ka tae atu ia ki tōnā taha.