Noho mū ana Te Rōpū Wāhine Māori Toko i te Ora mō te wehenga o tōna kaiwhakahaere

Kua wehe te Kaiwhakahaere o Te Rōpū Wāhine Māori Toko i te Ora i tana tūranga, ā, kei te noho wahangū te rōpū he aha ia i wehe atu ai.

Nō te marama o Poutū-te-rangi i te tau rua mano tekau ma toru i taki ai a Awhimai Reynolds i te rōpū nei.  Kāore anō i hipa te rua tau nō tana kuhunga ki te tūranga.  Kei te noho mū te rōpū, engari i kōrero a Te Kāea ki tētahi mema e raru ana mō ngā rā kei tua mo te rōpū.

Kua whitu tau a Ata Te Kanawa e noho ana hei mema o Te Rōpū Wāhine Māori Toko i te ora, engari inaianei e hiahia ana ia kia puta.

I whakatū te rōpū i konei i Te Whanganui ā Tara i te tau kotahi mano e iwa rau rima tekau mā tahi, ā, i whai wāhi atu rātou ki ngā take whare, hauora, whānau hoki.  E ai ki te rangatira o te whare kākahu Māori, a Miromoda, ki a Te Kanawa, he mana nui tō te rōpū.

I te hui whakatau i a Awhimai, inā te nui o tōna koa.

Engari e rua ngā īmera i whiwhi i a mātou o Te Kāea e whakaatu ana i te rā toru tekau o Whiringa-a-rangi, i whakamohio atu te Perehitini, a Prue Kapua, ki ngā mēmā, kua whakawātea ake te kaiwhakahaere, a Awhimai Reynolds i āna mahi.

Nō te tekau ma rima o Kohitātea, ka tae mai anō he īmera i te Perehitini e tohu ana, kua puta a Reynolds i te kuaha.

I kaha tono a Te Kāea ki te rōpū kia tuku whakautu mai, engari auare ake.

Ka noho a Materoa Dodd hei kaiwhakahaere mō te wā, ā hei te tīmatanga o Hui-Tanguru ka tīmata te tukanga rapu kaimahi.