Kaupapa: Christmas

Ngā pūrongo ā tihi rongonui rawa o te tau 2014

Wepiha Te Kanawa

Kia hoki whakamuri atu tātou ki ngā āhuatanga i rata mai ai koutou, ngā kaimātakitaki mā runga i tā mātou whārangi ipurangi o Whakaata Māori.

I koahia e Wepiha Te Kanawa ngā kaupapa rongonui tekau o te tau ā tihi.

Hei tīmata i te rārangi o ngā kaupapa miharo mō te tau, he kaupapa hinapouri.

Ko te hapori tērā o Ōtamatea i raro i te kapua pouri, i te rongotanga ake i mate a Jordan Kemp he tekau mā whitu tau te pakeke i a ia e tākaro whutupōro ana i te marama o Hōngongoi.

E noho ana ki te tūranga tuaiwa ko tētahi kaupapa hiranga nui mō te hapū o Te Waipounamu a Ngāti Waewae, me te whakatūwheratanga o tō rātou whare tipuna tuatahi ko Tuhuru. Koinei te wā tuatahi i ngā tau kua pahure kua kite i te wahine i roto i ngā nekehanga wero.

Ko te kaupapa tuawaru, ka anga atu ki te Whare Toi o Depot ki roto o Takarunga ki Te Raki Paewhenua i Tāmaki, ki reira pūpū ake ai te wairua kaikiri mō tētahi whakaaturanga toi Māori. I rongo kōrero te whare toi nei mō te tono a ētahi o te hapori ka tangohia ngā mahinga toi, i tuku wāea hoki te Kaunihera o Tāmaki ki a rātou e mea ana kia tangohia ētahi haki e rua, i runga i ētahi pou nō te Kaunihera.

Ko te pūrongo tuawhitu ka huri te ihu o te waka ki te whare hoko kai o Countdown ki Dinsdale I Kirikiriroa. Ohorere katoa ana ngā kaimātakitaki I te rongotanga ake I whakapaetia he whānako kai te mahi a tētahi wahine hapū a Rikki Cooper.

Ko ngā hemonga kapa haka te take i eke ai tēnei kaupapa ki te tūranga tuaono. I hoki atu ngā Whakaihuwaka o te whakataetae kapa haka mō ngā Kura Tuarua a Rākaumangamanga ki Waahi Pā, me ā rātou taonga kahurangi, anō nei he pōhiri mā te kīngi te pōhiri ki a rātou.

Ki te tūranga tuarima, whakatakariri ana te motu i te kitenga i tētahi kiriata e whakaatu ana i tētahi tamaiti e haurangi ana ki tētahi papa tākaro ki Kirikiriroa i Fairfeild. I kōrero atu a Te Kāea ki te whāea o te tama nei.

Ki te tūranga tuawhā, hiakai katoa ā mātou kaimātakitaki ki te kite i ngā tino toki kanikani hip hop o Tāmaki. Ko te rōpū kanikani o Parris Goebel 'The Palace' i whai tūranga ki ngā wahi e rua, ngā teina. Me te wāhanga whare wānanga. Kō ngā Torekaihuruhuru tērā a Malitia i toa i te wāhanga pakeke.

Ki ngā tino kaupapa e toru, he tau miharo tēnei mō te ao kiriata Māori, ko The Dark Horse, What We Do In The Shadows me The Dead Lands i whakatairangatia tuatahitia ki tā wāhi. Heoi ko te kaupapa i mau ki te hirikapo ko te whakapuakitanga ki Aotearoa nei.

Ko te tino kaupapa tuarua ki ngā kaimātakitaki i whakaohorere katoa i te motu. I whai mātou i te whetu rīki a Luke Tipene, mai i tōna weronga ki te oka ki waho ake i tētahi whare i Tāmaki, ki tōna whakamaumaharatanga ki te whare rīki o ngā Glenora Bears.Tae atu ki tana rua kōiwi ki te Taitokerau ki Ahipara, e takoto ana ki te taha o tōna pāpā.

A, ko te tino kaupapa i matakitakina mā te ipurangi i tēnei tau rua mano tekau mā whā, ko te wā i uiui ai a Te Kāea i a Ngāwai Rewha, e pā ana ki āna tama tokotoru i whakapaetia he mahi whānako tā rātou ki tētahi toa Kathmandu i Onehunga.

Koira ngā mahi i tutuki i te tau rua mano tekau mā whā.