Ngā Māori kua whakanuia e te Kāwanatanga mā ngā tohu hiranga

Ma te whakanui i ngā tāngata whakapou kaha ki tēnei whenua ka whakanui ano i te tau hou.

Kua whakaingoatia te hunga kua whiwhi i ngā tohu hiranga a te Kāwanatanga.

Ko tētahi o ngā mataamua o te ao matauranga ki roto o Aotearoa ko Toby Curtis tēra e whakaaro nuitia ana mo āna mahi a kua whakawhiwhia ki te tohu nui ara te Tā.

Ko tāna, “na te tirohanga o rātou ki waku mahi i whakaaro ake pea, me puta mai tēra tohu ki au kare au i pēra taku titiro.”

Kua oti i a ia ngā mahi kaiako i te kura tuatahi, te ako i ngā tamariki hauā ano hoki. I ngā tau waru tekau ko ia te tumuaki o Hato Petera me te tumuaki tuarua o te Kura Whkangungu Kaiako ki Tāmaki. No te tau rua mano tekau ma rua ka riro i a ia te turanga toihau mo ngā kura ā Iwi o Aotearoa.

He tohu tēnei kare rawa ia i whakaaro ka mau i a ia.

Engari tēra ano ana mahi i tu ātu i te ao matauranga. Ko ia tonu te toihau o nga roto moana o Te Arawa, te toihau tuarua o te hunga rautaki o ngā roto moana me Te Wānanga o Aotearoa. He mema ano hoki mo te Komihana Pirihimana me te Kāhui Rangatira. A ko ia ano hoki te toihau mō Whanau Ora i te rohe o Te Arawa.

I whakanuia ano hoki a Hekenukumai Busby mo āna mahi ma te Iwi Māori. He kaha tonu ia ki te whakaū i ngā mahi tarai waka ki ngā tāngata o Te Taitokerau otira o Aotearoa whānui. I whakawhiwhia a ia te tohu Āpiha.

He reo e rongonuitia ana te ao papāoho, ahakoa irirangi mai, pouaka whakaata mai. Engari nā āna mahi i te hapori me te hauora Māori kua whakanuia a Kingi Biddle ki te tohu hapori.

Ko ia tonu te kaikōkiri i te whakaora hāere i te reo o Ngāti Whakaue mai ano i te tau rua mano tekau. He kaupapa kua kitea e whanake hāere ana te reo i ngā kainga o ngā whanau kotahi rau.

Ko Michael Skerrett o Murihiku ano i whakawhiwhia ki te tohu hapori mo āna mahi hāpai i te Iwi Māori ki reira. Ko ia tonu te māngai o te iwi i te Kaunihera o Murihiku.

He Māori ano i whakanuia – Ko Majorie Joe o Ahuriri i whakawhiwhia ki te tohu āpiha mo āna mahi nui i te hapori me te hunga Māori.

Ko Kathleen Maureen Jehly o Rotorua i whakawhiwhia ki te tohu huānga mo āna mahi i te ao matauranga.

Ko Amoroa Luke o Wairau i whakawhiwhia ki te tohu huānga mo āna mahi mā te iwi o Ngāti Rārua

Ratou ko Minita Judith Anne Cooper o Tāmaki Makaurau mo āna mahi mā te hapori.

He tohu ka tika kia whakanuia e te iwi Māori.

Tuaritia: