Native Affairs – Hei taku Awhi

Renee Kahukura Iosefa

I ngā wiki tata nei kua pāhika, whakakukumetia ai ngā tauwharenga o te manawa i te whakapāhotanga atu i ngā kōrero mō Awhi rāua ko Kahia Paul, he tūākana teina e rongo tahi ana i te ngau o tētahi pōkīkī iranga ōngē nei, me te mea anō hoki, he rerekē ō rāua ara putanga.

I riro mā Awhi kia rongo i tōna hauātanga ā-tinana, ā-hinengaro anō hoki.

Nā, i te kapohanga mai o ēnā kōrero, i puta i te whānau a Awhi ā rātou hiahia kia hokona mai he puna wai mahana mō Awhi.

I rongo mārika tā mātou kaikāmera i te wairua o te kaha o te whānau ki te tiaki i a Awhi, i whakatū i a ia tētahi whārangi ipurangi mō te whakaemi pūtea te take.

Nā whai anō tō koutou tuku pūtea mai.

Ā, i taua wā tonu, i tae atu ngā kōrero ki te tira o Forme Leisure Spas, ā, i toko māpuna mai te hiahia kia tinana ērā wawata ā rātou.

I hoki atu tā mātou kaikawe kōrero, a Renee Kahukura Iosefa, me te kaikāmera, me Murray Job ki te kite i tō te puna tūtakitanga ki ōna rangatira hōu.