Me whakaputa whakaaro te iwi Māori mo te arotake ki ngā ture tūkino whānau

Kua puta te āki ki ngā whānau ngā hapū  me ngā iwi puta noa ki te tuku i a rātou whakaaaro mo te arotake e āta wherawhera ana i ngā ture tūkino whānau. 

I whakarewahia te arotake e kiia nei ko "Strengthening New Zealand's Legislative Response to Family Violence" inanahi e te Minita Take Ture e Amy Adams hei tautoko i te whāinga ki te whakaiti i ngā raru tūkino whānau e kaha kitea ana ki Aotearoa. 

Ki tā te Minita e kore e tāea te Kāwanatanga anake te whakatika i tēnei raru nui, nā reira kua puta whānui te tono ki ngā ratonga hapori katoa ki te whai whakamarama hei whakapakari i aua ture. Ko tāna ano e kaha pēhia nei ngā whānau Māori e ngā raru tūkino, nā kona he mea whakahirahira kia whai whakaaro ngā iwi ki tēnei kaupapa. 

Ko te whakatau a Marama Fox o te Pāti Māori, e mōhio pū ana te motu ko ngāi Māori ēra kei te kaha patua e tēnei raru, inā kua puta te tautoko a te Pāti Māori kia tū mai ngā whānau, ngā iwi me ngā hapū o te motu.   

E āta tirohia ana tēnei arotake ki ētahi wāhanga o ngā ture tūkino whānau e hāngai ana ki ngā kaupapa whakamaru patunga, ngā kaupapa whakamōhio atu ki ngā ratonga ka tāea te awhi patunga, ki ngā ratonga hoki kua whakatūhia hei manaaki i ngā patunga o ēnei mahi. 

Ki tā te Minita Whakawhanake i ngā take Māori ki tā Te Ururoa Flavell e ngākaunui ana ia ki ngā kaupapa kua whakaritea e te Kāwanatanga me te whai i ngā tikanga o Whānau Ora ki te whakakotahi i ngā tari kāwanatanga kua whakaritea hei  āwhina i ngā whānau kua tūkinohia. 

Ka kapi te wā mo ngā tono hei te tekau ma waru o Hepetema 2015.