Kaupapa: ANZAC

Me noho taurite ngā whakanuitanga o nga pakanga o konei ki tō ANZAC

Mere McLean

Nuku atu i te kotahi rau ngā tāngata i whakarauika atu ki Whareroa Marae i te rangi nei mō ngā whakamahara.

Hei tā Mabel Wharekawa-Burt, nō Ngāiterangi me Ngāti Ranginui e mea nei, “Ka tīkina e te māuri o tēnei rā, hei oranga mō tātou.”

Ko tā Paora Morunga, he uri nō Ngāiterangi me Ngāti Ranginui, “Ki ōku nei whakaaro me whakanui tēnei rā ki ngā tāngata katoa o Aotearoa kia kore rātou e wareware ō tātou tāngata ki rāwāhi ki te whaiwhai mō tātou.”

Ki tā Kihi Ngatai, rangatira o Tauranga moana, he huinga tēnei i tītīkaha ki te ngākau o te hunga i tae atu.  Hēoi, tērā tētahi huinga nui kē atu, kei mua i te aroaro mō tōna iwi, arā, te whakamaharatanga ki te kotahi rau, rima tekau tau o te pakanga o Pukehinahina - he kaupapa me whai mana ki roto o Aotearoa whānui. 

Hei tā Kihi e mea nei, “he kaupapa anō tērā, te maumaharatanga ki ngā pakanga i pakangahia ai i Pukehinahina me Te Ranga.” 

Hei te wiki e tū mai nei, ka whakamahara tātou i te tau kotahi rau, rima tekau tau i tū ai te pakanga ki Pukehinahina, he tūāhuatanga tēnei e here ai a Ngāi Māori me Ngāi Pākehā nā runga i te mate.

Hei tā te uri o Raukawa, tā Paraone Gloyne, ko taana e mea ana “Kia kāua e tōwaitia ērā kino i roto i ngā tau, kei wareware tātou, ko te mutunga iho o te pakanga ko te mate.”

Nā Paraone Gloyne ngā akiakinga i te hui whakamaharatanga mō Ōrākau i tēnei tau, ā, nānā te aki kia ōkawa te titiro o Aotearoa ki ngā pakanga Māori, hēoi ko te pātai mēnā me whai wāhi ngā whakamaharanga mō nga pakanga Māori ki ngā whakanuitanga o tēnei rā.