Kaupapa: Politics

Me hūnuku ētahi mahi whakahaere a CYF ki te rāngai tūmataiti?

Kei te whakahē te mema pāremata Māori o Reipa, a Peeni Henare i te hūnukutanga o ētahi o ngā mahi whakahaere a Te Uehā Mātātahi o Aotearoa ki te rāngai tūmataiti.  He whakaaro tēnei i toko ake i muri i te putanga mai o tētahi pūrongo whakahē i te tari i tāna kite i ētahi raru nui i roto i āna whakahaere.  He whakaaro kaare te Pirimia a John  Key mō te whakakore ake.

Kei te taunaki te Tumu Whakarae o MUMA i te whakaaro o te Pirimia kia hūnuku ētahi o ngā mahi whakahaere o Te Uehā Mātātahi o Aotearoa ki te rāngai tūmataiti.

Hei tā Willie Jackson, "I te mea kaare e tika te mahi o CYF kei te mōhio mātou i tērā."

I hua ake tēnei take i muri i te putanga o tētahi rīpoata a te Kaikomihana Tamariki, a Tākuta Russell Wills e mea ana arā kē ngā raruraru ki roto i ngā tātaitanga a Te Uehā Mātātahi me te pātai mēnā he pai te noho a ngā tamariki ki raro i te maru a te Kāwanatanga.  Ka mutu, e mōniania nei te mema pāremata o Reipa a Peeni Henare i te whakaaro ka hopukina ngā kirimana matawhāiti e ngā ringa o Serco.

Hei tā Peeni Henare, "Ko a rātou mahi whakahaere i ngā whare herehere koinā tētahi take nui o te wā nei mō te hunga e whakahaere ana i ngā ratonga mō te tangata."

"He rerekē tēnei kaupapa ki SERCO, kei te mōhio ngā Urban Māori Authorities te mahi o tō tātou iwi ia rā ia rā," te kii a Jackson.

E ai ki tēnei rīpoata, kei te noho takaoraora Te Uehā Mātātahi i ngā kēhi kotahi rau rima tekau te nui ia tau e pā ana ki te tūkino tamariki, whakangongo tamaiti hoki, ka mutu kāore he paku āwhina tō Te Uehā mō ngā kaitiaki me ngā kaimahi e tiaki ana i te rima mano kotahi rau toru tekau mā toru o ngā tamariki i raro i te Kāwanatanga.

"Me whātoro atu ngā ringa ki ngā ratonga hapori, ki ngā iwi ko reira ngā rongoā.  Kaua e tukuna atu mā tētahi nō tāwāhi kē te whakahaere i ēnei ratonga," te kii a Henare.

Ko te kitenga ā ētahi kaitiaki tamariki mō ngā waiaro a Te Uehā Mātātahi, he mahue noa i te tamaiti wawao kore, ka rere atu.  Ko te nuinga o ngā tamariki i raro i te tiaki a te Kāwana, he Māori nā reira ko te tūmanako ka wawe te whakatika a te Kāwanatanga i ngā raru ki roto i taua ratonga.