Kaupapa: BUDGET

Māori Party admit more progress needed despite gains

E rere ana ngā whakamihi a ētahi rangatira Māori ki Te Pāti Māori mō ngā whiwhi i te tahua pūtea i whakapuakitia inanahi. Heoi, e ai ki tētahi māngai ā-hapori Māori, he nui tonu ngā mahi hei mahi, e rongoā ai te noho pōkaikaha o ngā whānau maha ki Tāmaki. 

He hakari e hora nei i te parakuihi a te Pāti Māori i te ata nei, i muri i te putanga o te tahua pūtea.  Engari, ko te hunga rawa kore te whakaaro nui mō ngā manuwhiri.

Hei tā Sharon Hawke nō Ngāti Whātua ki Ōrakei, “Korekainga, korekai ma ngā tamariki, kāre he wāhi mo te tiaki pai te hauora pai ma te marea, nā te mea, ko te mea nui, mō ngā tangata Māori, he awhi, he mātauranga, he mahi mō ngā whānau katoa.”

E whā tekau mā tahi ira tahi mīriona tāra ka whakapaua a ngā tau e whā e hāere ake nei mō ngā whare ohotata me te Utu Pūtea hou mā te hunga pōkaikaha.  Wheoi, e whakapono ana tēnei kaihāpai hapori, me mahi ngātahi a Ngāi Māori.

E ai ki a Kahurangi June Mariu, “Ko te inoi atu, homai ngā moni kia whiwhi whare ngā mea e hiahia ana, engari ko tātou te iwi Māori, me āta whakaaro tātou katoa mō tēnei take.”

Nō tēnei marama, i kī atu atu te Minita Whakawhanake Māori, e tekau mā rua ira ono mīriona tāra tāpiri mō ngā whare Māori, engari, hei tāna ehara i te mea, he rongoā horo, mō te raru nui.

“E kore taea e au te whakatikatika i ngā raruraru, i ngā uauatanga, ngā taimahatanga katoa i te ao.  Ko tāku kē ko te titiro ki ngā rauemi ki roto i tōku ake ringaringa,” hei tā Flavell.

Koatu i te hautoru o te hunga e noho korewhare ana i Aotearoa, he Māori.  Ia tau e tekau mā tahi ira ono mīriona te rahinga pūtea, ka riro ki Te Kōtuinga Whare Māori mō ngā whare Māori.

Hei tā Flavell, “Ko te hunga korekainga, tae noa rā ki te hunga e hiahia ki te hanga whare.  Nō reira, o roto i tērā whiriwhiringa.  He hiahia nōku ki te tohatoha i tētahi pūtea o roto i tērā whiringa, hei āwhina i tērā hunga.”

E whakaaro ana te marae o Hoani Waititi i te uru o Tāmaki, mēnā rānei ka manāki hoki rātou i ngā whānau.