Ma te whakapiki utu ka huri pea te hunga kaitūpeka ki te huarahi auahi kore

Ka whakaarorua pea te hunga kaitūpeka ki te hikina te utu tāke mō ngā hua tūpeka a tērā tau, hēoi ahakoa tonu tērā e mea ana te hunga taunaki i te patu tūpeka me kaha ake ngā whakawhiu, kia auahi kore ai a Aotearoa a te tau rua mano rua tekau mā rima.

E mōhio pāhi ana a Zoey Hawke ki ngā aupēhitanga o te momi hikareti ki te Māori, engari hei tāna e kore hoki ngā utu o naianei e kaupare i te ngāngara nei

A te tuatahi o Hanuere, ka piki ake te utu o te tāke hikareti kia tekau paihēneti, engari ko te tino pātai, ka whai hua te rautaki nei?

Ā, me he mea he utu nui rawa tērā ki a koe, e hiahia ana ngā kaihauora Māori kia piki ake anō rā taua utu.

Ko te hunga Māori, te iwi kai tūpeka nui rawa o te motu, ā, ko tērā ahuatanga tonu te kaihika i te ahi mā Hone Harawira.

E hiahia ana ia kia auahi kore te motu hei te tau rua mano rua tekau mā rima, ēngari hei tānā, me huri hoki kē te aro ki ngā kamupene tūpeka. 

E ai ki a Hone Harawira, “Taku āwangawanga, e patu tonu ana mātou i ngā tāngata e kai hikareti ana. Ko te tino hoariri ehara ko rātou, engari ko ngā Kamupene (kē).”

Hei tā te National Māori Tobacco Control Leadership Group, me piki ake te utu tāke kia rua tekau paihēneti kia tutuki marika te wawata o te tau rua mano rua tekau mā rima.