Kaupapa: BUDGET

Mā te Māngai Pāho te pūtea e whakahaere mō te whakawhanake i te ohanga Māori

He kongakonga noa iho te toru tekau miriona tāra kua whakatahatia i te tahua pūtea i tēnei tau hei tautoko i tētahi ara hangarau whakawhiti kōrero Māori.

Koinā tā Te Kaunihera Māori, tētahi o ngā rōpū i whawhai kia riro ai i te iwi Māori tētahi wāhanga o ngā iarere pari kārangaranga, i te whakapuakitanga a te kāwanatanga i te rā nei, ka riro mā Te Māngai Pāho taua pūtea e tohatoha.

Ko te Māngai Pāho te rōpu i kōwhiria hei whāngai i te pūtea toru tekau miriona i ngā tau e whitu kei te haere mai, ki ngā kaupapa tika hei tautoko i te whakawhanaketanga o tētahi ōhanga hangarau whakawhiti kōrero mō Ngāi Māori.

He kotahi tau te roa, he rima rau mano tāra e wātea ana ki Te Māngai Pāho kia kimi i ngā tāngata tika hei toha i ēnei pūtea.

Heoi e ai ki a Maanu Paul, māngai mō tētahi o ngā rōpū e toru i whawhai ki ngā mana karauna nō ngā tau iwa tekau, kia whakahokia mai ētahi o ngā mana whakahaere pari kārangaranga, mei kore tēra whawhai a rātau, i hua ai tēnei pūtea i te tuatahi.

Otirā, kāore tō rātau māngai ki te tēpu whiriwhiri i tēnei pūtea, ā, ki te whakatūturutia te mana nui hou nei, Te Mātāwai, kāore hoki to rātou reo i reira.

Hei tā Paul, kua hē ngā rā o te Minita Take Māori.

Hei te wiki e heke mai nei, tīmata mai ai a Te Māngai Pāho i tana huarahi hōu me ēnei moni hōu.