Kaupapa: Domestic Violence

Kua whakarewaina e te Minita Take Ture tētahi arotakenga hei rapu huarahi ki te whakaiti i te mahi tūkino ā-whānau

Nā te kikino rawa atu o ngā tatauranga tūkino whānau o Aotearoa te take kua whakarewaina e te Minita Take Ture, e Amy Adams tētahi arotakenga hei rangahau i ngā ture mahi tūkino a whānau me te rapu huarahi ki te whakaiti i aua tatauranga. 
 
He pakanga nui kei mua i te aroaro o te Minita Ture, ki te whakatīnana i ngā hiahia a te Pirimia a John Key, kia turakihia atu ngā mahi tūkino ā-whanau, ā-tangata, ā-tamariki.
 
Me te whakahau anō a te Minita e kore e tāea e te Kāwanatanga anake, engari me toro atu te ringa āwhina ki ngā iwi, ki ngā hapori anō hoki.
 
Hei tā Amy Adams, “Me aro ake tātou ki te maha rawa o ngā mahi tūkino kei waenga i ngā whānau Māori, ā mēnā e hiahia ana tātou ki te whakatika i tēnei raru, me toro atu te ringa ka tika ki ngā rōpū ā-iwi huri noa te motu.”
 
I tēnei wā e taumahatia ana te whānau o LA Tukerangi nā te ngarotanga atu o tā rātou kōtiro 15 tau te pakeke, hēoi koia nei tonu tētahi o ngā momo mahi tūkino whanau e taea e tēnei arotake te whakakaha ake i te ture.
 
Ki tā Amy Adams, “Kāre aku mōhiotanga i tua atu i ngā pūrongo kua puta engari, he hara tonu ngā mahi kāhaki tangata, me ngā mahi pāwhera anō hoki, engari ka kitea tonu tēnei momo, he tangata kino, ka aruhia e ngā pirihimana, hēoi ko tāku he aro kia hāngai ngā ture tautoko kia rātou.”
 
E toru ngā whāinga a te arotakenga nei "Strengthening New Zealand's legislative response to family violence" tuatahi ko te whai āwhina mō te hunga kua tūkinotia, tuarua he whakawhiu kaha i te kaihara, tuatoru ko te whakamutu katoatia ngā mahi tūkino ā-whānau.