Kaupapa: Mining

Kua whakapuakitia ngā takiwā hōu e whakamaheretia ana mō ngā mahi rapu hinu, kāpuni hoki

Nō te rangi nei, ka whakapuakitia ngā takiwā hōu e whakamaheretia ana e te Kāwanatanga hei whakatūwhera i ngā mahi rapu hinu, kāpuni hoki hei te tau rua mano, tekau mā whā. Neke atu te wha rau mano kiromita huarua te wāhi e tirohia ana.

Ko ngā pikitia o Te Whānau-a-Apanui e porotēhi ana ki ngā mahi rapu hinu i te riu o Raukūmara, kua tōkia ki ngā mahara o te hunga kainoho ki Te Tai Rāwhiti.

Ko Te Tai Tokerau tētahi o ngā takiwā; e waru kua whakaritea e te Kāwanatanga mō ngā mahi rapu hinu, kāpuni hoki.

E ai ki te mahere, e rima ngā wāhi ki tai, e toru ngā wāhi ki uta.

E ai ki te minita ki a Simon Bridges, he nui ngā painga ka puta i ngā mahi keri hinu, ko ngā tūranga mahi tētahi.

Āpiti atu e rere ana ngā āwangawanga mō ngā ture hōu kātahi anō ka mana; tuatahi, he whakapakari i ngā hāmene ki te hunga porotēhi, tuarua, he huna i ngā whakamārama a ngā tono.

Hei āpōpō tīmata ai ngā mahi whiriwhiri mō ngā marama e rua.