Kua whakapāha a Harawira mo te hē o ana kōrero

He kōrero i poroa kē ai te kaki o Hone Harawira, mona e mea nei he tangi kuri noa ta te hunga papaho mō te whakapae a tētahi wāhine i pawheratia ia e tētahi mangai kawanatanga no Merehia. 

Hei tā Hone Harawira, “He kōrero e taka ana i te arero, taka ana i te arero i tena po.  Engari mena kua hanga mamae ana ki te wāhine kua he.”

I rapa whakapaha a Hone Harawira ki tona wharangi pukamata i te rangi nei, he kotahi wiki whai muri i aua kōrero rā.  Ko Tania Billingsley te wāhine e whakapae nei i tukinotia ia e Muhammad Rizalman bin Ismail. 

Ko te whakapae i whai a Rizalman i a Billingsley ki tona kainga, ki reira tukinotia ai me te pawhera i a ia.  Na wai rā i mauheretia, ka tu ki te aroaro o te Kooti a Rohe o Te Whanganui a Tara, engari, mea rawa ake ka hoki ki Merehia i te take e tarewa tonu ana.

Hei tā Harawira, “Taku whakaaro i taua wa, he kōrero mō te tangata kua hoki atu ki tona kainga engari e mea ana wetahi ko te tirohanga he korero whakaiti i te wāhine.   Noreira, e whakapaha ana au ki a ia, e aroha ana au ki tona kaupapa, tautoko ana au i a ia.”

Inapo i tuku uiui a Tania Billingsley ki te hotaka, 3rd Degree, me tana karanga kia rihaina te Minita a Murray McCullay mō tana ngoikore ki tēnei take - matua ra te ahua i hoki atu ai a Rizalman ki Merehia. 

Kaati kua tohua a Rizalman kia hoki mai ai ki Aotearoa, engari kei roto hohipera ia i tēnei wā, ka mutu kare ano te rā mō tana hokitanga mai kia whakatauria.