Kua whakanuia ētahi Māori e ngā honore a te Kuini o Ingarangi

Ko ngā tohu hōnore a te Kuini o Ingarangi, ka tohatohatia ia tau hei whakanui i tōna rā whānau. Ko ngā tāngata ka whiwhi i enei taonga ko era kua whakapau kaha, kua whakaheke werawera, kua kake whakarunga i roto ia rātou nei mahi, mō ngā iwi whānui o Aotearoa te painga.

He maha ngā uri Māori kua whakahonoretia i tēnei tau.

Ko Justice Lowell-Goddard kua uhia ki te tohu Kahurangi, a koia te wāhine Māori tuatahi kia whiwhi tūranga ki te Kooti Teitei o Aotearoa.

He tokotoru kua whakawhiwhia ki te tohu (CNZM) arā Companion of the NZ Order of Merit, ko Ahorangi Jonathan Mane-Wheoki mō ana mahi nui i roto i te ao whakātu, rangahau me te waihanga toi, ko Ahorangi Matua Hingangaroa Smith, me Tākuta Huirangi Waikerepuru mō a raua whakapau kaha ki te rangahau me te whakaora i te reo Māori.

Tera ano ētahi kua whakanuia mō a rātou mahi kua tutuki i waenga i o rātou ake iwi, o rātou ake hapū, a mō te tohu ONZM Officer of the NZ Order of Merit, ko Riki Herengitana-Cherrington mo te hanga i te marae o Murihiku, ko Rangitane Marsden mō ana mahi arahi i ngā whakataunga kereme a Ngāi Takoto, Haami Piripi mō ana poipoi i te reo Māori, mō ana mahi ano mō tōna iwi o Te Rarawa.

Mō te taha hauora, kua kitea ngā tino pukenga awhi tāngata, a Miri Hawaiki (MNZM), a Takuta Tony Ruakere MNZM, me heather te Au Skipworth, kua whiwhi i te tohu QSM, te Queens Service medal.