Kua whakanuia e Aotearoa te tau hou

He whakakitenga miharo mo ngā iwi katoa o Tāmaki Makaurau, te mātakitaki i ngā pahū atāhua mai i te whare tapere o Skycity, ka muramura mai i te pō, hei tohu i te taenga mai o te tau hou.

Huri noa te motu e whakanuitia ana te tau hou, me te aha koia nei tonu te wā e piki ai ngā mahi tukino, me ngā raruraru e whakapaetia ana, na te waipiro te take.

I kitea tēnei ahua i Whangamatā inapō, engari kāre i tino kino rawa atu.

Tera ano ngā ripoata Pirihimana mai te rohe o Matātua me etahi atu rohe o te motu, e mihi ana ki ngā iwi o te kainga i puta inapō ki te whakanui i te tau hou, he paku noa ngā raru i pupū ake.

Kāti e whakapaetia ana, akene pea na ngā ture waipiro hou i whakamanahia i tera atu wiki te take i penei ai.

Otira, tera tonu te āwangawanga a ngā pirihimana mo te hunga rangatahi. Me kī ra ngā kotiro, e inu ana i te waipiro, ko rātou me tupato, me manāki.

Ko te tumanako ia ka noho ora katoa te hunga ngahau, te hunga whakanui i te tau hou, tae noa ki te mutunga o te wā hararei, e hoki ai rātou ki rātou kainga.