Kaupapa: Arts

Kua whakamoea ngātahitia a Cliff Whiting rāua ko tōna whaiaipo

He toi nuku, he toi rangi a Clifford Hamilton Whiting kua whakamoea ngātahitia ko tōna whaiaipo i tōna kāinga, i Te Kaha. I mate a Heather i te tau rua mano, tekau mā tahi, ā ko tā tōna whānau, he whakatutuki i ō rāua ōhāki.

Ahakoa te pōuaua, e whita tonu ana te ngākau o Te Whānau a Kaiaio kia au ngātahi te moe o tō rātou pou me tōna makau.

Hei tā tētahi kaumatua tā Haki McRoberts (Te Whānau ā Apanui), "Tino koa mātou kua hoki mai nei ki a mātou i runga i tōna rongonui o te ao nei. Kei te hia ngā iwi katoa kia pupuri i a rātou, engari ko mātou i haere ki Kororāreka ki te tiki i a ia."

Nā Whiting tētehi waka huia i whakaairo whai muri i te matenga o tōna makau e ono tau ki muri, me te tōmina kia tanumia ngātahitia ai rāua.

Hei tā Rāwiri Waititi, "Ko rāua rāua i wā rāua rā, kāre rātou mō te wehe. Ko rāua rāua i roto i te ora, ko rāua rāua i roto i te mate i tēnei rā."

Nāna te huarahi i para kia puāwai ai ngā mahi toi onamata i te ao hurihuri nei, mā ngāna tikanga auaha hōu i ngā marae hurinoa i te motu. Nāna hoki ngā kaupapa o te kāinga i kōkiri.

Hei tā McRoberts, "Te rau tau o te kura nei o Te Whānau ā Apanui, nāna i whakaairo ngā tīpuna katoa, kia haere ngā tamariki ki te kura, kei reira e tūtū ana. Koinā tō rātou mea tuatahi, me mōhio rātou nō hea rātou. ko wai rātou, kia haere rātou ki roto i te ao."

"Ka ora ōna taonga ki te ao katoa. He nui wāna mahi tāwāhi, he nui wāna mahi puta noa i te motu," hei tā Waititi.

Mohoa nei ia i hoki atu ki te kāinga hei whakahōu i te waka tohorā o Haungutu Wera me tōna Whare tūpuna o Kaiaio.

Hei tā Waititi, "Koia te tauira me pēhea te mahi i ngā mahi. Kei te pai ki te titiro ki ngā mahi o ngā mātua tīpuna, engari ko te ahunga whakamua kei roto i te whatumanawa o te tangata. 

E ora tonu ana a ia me tōna hoa rangatira i ā rāua tama e toru, Ko Gary, ko Dean, rātou ko Paul, ko ngā tini mokopuna hoki.