Kua whakamārama Te Papa Atawhai i te take e whakamahia ana te paihana 1080

I ngā whakatewhanga mō te wero kia ranua te paura miraka tamariki ki te paihana 1080 e haere tonu, i whai wāhi atu Te Papa Atawhai ki te whakamārama i te take e whakamahia ana taua paihana ra ki te patu i ngā kararehe whakapōrearea.

I te aroaro o te Kōmiti Whiriwhiri Take Kaunihera ā-rohe, taiao hoki Te Papa Atawhai i te rangi nei.

E whā tekau mā rua ngā tāngata kua whakapā atu ki te tari pirihimana i tēnei wā, ā, ko te tono kia pērā tonu pēnā kei tētahi ētahi atu whakamārama.

Kāti, mō te taha ki Te Papa Atawhai ehara i te mea koia anake te kaupapa i ata kōrerotia i te kōmiti whiriwhiri i te rangi nei.

E ai ki Te Papa Atawhai e rua tekau mā rua miriona ngā manu e mate ana ia tau, ā, ko te Kiwi ka riro pērā ki te Moa ki te kore te paihana 1080 e whakamahia.

I tua atu i taua raru o waho, ko nga raru tarawhare hoki te aro mō Te Papa Atawhai.  E rua tau ki muri neke atu he kotahi rau ngā tūranga mahi i poroa, ā, kei te rongo tonu te tari i te taumaha.

Kāti, i ngā tau e rua kua hori kua piki ake te nama mō ngā haererenga a Te Papa Atawhai mā te kotahi ira ono miriona tāra. He utu o te poronga tūranga.

Heoi, ehara i te mea kua kore rawa nga hua i Te Papa Atawhai.  Ko ana whanaungatanga me ngā iwi Māori e pahupahutia ana, matua rā me Ngāi Tūhoe.

Ae mārika e pakari haere ana te ara whanaungatanga ki ngā rōpū o waho, ko te tino wero kia pērā hoki i waenga tonu i ngā kaimahi o Te Papa Atawhai.