Kua whakamānuhia te pakipūmeka ā-tihi hou o POI360 ki te Hui Korakora

Akuanei whakamānuhia ai te pakipūmeka ā tihi hou ko POI360 te ingoa ki te Hui Korakora, te kaupapa whakakapi i ngā mahi whakanui i a Matariki.

Kei te Tiriti o Federal i te pokapū o Tāmaki Makaurau te huihuinga nei e tū ana i tēnei pō.

Kua aukati te haere o ngā motuka ki te tiriti o Federal, ā, kua huri te rori hei wāhi hoko kai, whakaatū pueru e wherawhera ai ngā rongo katoa o Te Ao Māori.

Engari, ko tētahi o ngā kaupapa matua ko POI 360.

E ai ki a Makaira Berry, “Te tikanga ia ka rikoatahia e au te demo noa iho. Nā wai rā, kei konei au i tēnei ra e waiata ana, i te waiata tuturu o te pakipumeka nei na reira e tino hari ana e hikaka ana.”

Mō te whakamānutanga o te whārangi ipurangi, pakipūmeka hou a POI 360, ka waiho ake i ngā akonga o Te Wharekura o Hoani Waititi Marae, ngā mema o POI E, Paatea Māori club ngā whetu Kapa Haka hoki te poi ki te tiriti o Federal.

Ki tā Kahurangi Maxwell, “Te whakapapa o te poi, kahore anō pea tātou kia tino wānanga i tērā āhuatanga o te poi. Nā reira ae he hōnore nui.”

I takea mai te whakaaro nei i a ngā Kaihautu a Lanita Ririnui-Ryan rāua ko Amomai Pihama. Hei tā Ririnui-Ryan, ko POI 360 he ahurea ka whakatairanga i te orokohanga mai o te poi me ētahi atu kōrerō pārekareka.

Mō muri ake i te ono karaka, ka puta atu te whārangi ipurangi o POI 360 ki te ao.