Kaupapa: Te Matatini

Kua whakamanahia Te Reo ki te rārangi whai kaute o Te Matatini

Nō te rangi nei ka whakamanahia te urunga o te reo Māori ki te rārangi whai kaute o te pae whakawā o Te Matatini.

He mūrau nā te tini, he wenerau nā te mano, he take tēnei i ara ake i ngā kai-āki reo i runga i te whakaaro, me whakamana ko te wāhi ki te reo i roto i ngā mahi kapahaka. 

I te rangi nei i hui ngā māngai o ngā rohe whakataetae tekau mā toru huri noa i te motu, ā, ko te kaupapa matua ko te whakamanatanga o te reo ki te rārāngi mātāmua o Te Matatini. Ko tā te heamana o Te Matatini, ko tā Herewini Parata, i whakaae atu te katoa ki te mōtini kia whakamanahia peneitia te reo.

Hēoi nā te āwangawanga ā ētahi ki te āhua e whakawātia ai te reo, i whakahē ai ētahi o ngā whakatiketike o te ao kapahaka ki tōna whakaurunga hei wāhanga mātāmua.

Kua toru tekau tau a Tihi Puanaki e whakaako Kapa Haka ana, mai i āna ākonga kura, tae noa ki ngā pakeke i te Kapa Haka ka tū ki te Matatini i tona kapa ake a Te Kotahitanga,

Heoi i te putanga o te whakatau a Te Matatini i tēnei rangi tonu, ka mana ko te Kairangitanga o te Reo Māori ki te whiringa mātāmua o te whakataetae, kātahi tōna pāpouri

Kāti kua roa rawa ētahi tāngata penei i a Kaa Williams, mātanga Haka, mātanga reo Māori hoki, e pakanga ana, kia whai wāhi ai te reo ki te wāhanga whakataetae, kaua ki te whakawehe i etahi kapa i te rarangi matua, heoi he akiaki kē i te katoa kia eke i a ratau te taha ki te reo Māori hoki

E iri ana ko ngā tini whakaaro o kaihaka, o kaiako, o kaiwhakawā i tenei whakatau a te Matatini mo te wāhi ki te Kairangitanga o te Reo Māori, me te mohio tonu, ko te patai kē, he aha tonu tenei mea, 'te kairangi o te reo'

Nōreira, he wero kei tua mā ngā rōpū whakataetae.  Aua atu i ngā wāhanga whakataetae e ono, kua whakauru atu anō tētahi hei āta whakarite mō te whakataetae ka tū hei te marama o Poututerangi rua mano tekau mā rima ki Ōtautahi.