Kua whakahētia e te Wharepora Hauora te uiui a Willie Jackson rāua ko John Tamihere

Kua tuhia e Te Wharepora Hauora Wāhine Māori he reta ki a Willie Jackson rāua ko John Tamihere whai muri i tētahi uiui tautohenga ki te piringa o tētahi o ngā kōtiro e whakapaetia ana nāna i tūkinohia e te rōpu Roast Busters.

I roto i te uiui i runga i tā rāua hōtaka a RadioLive, i te whiu pātai te tokorua ki te wahine i whakaingoatia ko 'Amy, he tekau ma waru te pakeke e pā ana ki te ahua o ngā kotiro i ēnei ra. Ko tā Tamihere ki a ia,  “kua pōraruraru te ahua o ngā kōtiro i ēnei ra?"  Ko tāna ano, "kāre i te tika kia inu waipiro ngā kotiro, nā te mea koira te take e raru ana te tokomaha." 

Ko te whakatau ano hoki a ēnei kaiwhakapāho, mena ka tū mai ētahi wāhine ki te tuku amu ki ngā pirihimana, akene pea ka peke mai ngā wāhine i whakaae ki te moe tahi mē aua tāne ki te karanga ko rātou ano ētahi i pāwheratia e rātou. 

I mua tata i te poupoutanga o te ra i whakapāha a Willie Jackson i runga i a RadioLive ki a 'Amy', heoi kīhai i a i tuku whakapāha mo tā rāua kaha ki te whiu pātai ki ā ia mo te ahua o ngā wāhine i ēnei rā. 

I roto i te reta a Te Wharepora Hauora Māori, nā Tākuta Leonie Pihama rāua ko Marama Davidson i puta mārika ai te āwangawanga ki te āhua o te uiui me ngā whakāro o te tokorua ra, inā ko raua tahi ngā kaiārahi o ētahi ratonga taunaki hapori ki te Tonga me te Hauāuru o Tāmaki.  Ko tā te reta kare i te tika kia tū rāua ki te whakahāere i ngā ratonga pēra mena kei te noho kūare tonu ki te ariā o te pāwheratanga ki ngā patunga me o rātou whānau. 

E ārahi ana te tokorua i ētahi rōpu whakahāere kaupapa taunaki hapori pēra i te hauora, ngā kaupapa tiaki hunga rangatahi me ō rātou whānau. Ka tukua hoki e te Kāwanatanga he pūtea tautoko ki a rāua hei kawe i aua kaupapa. Ko te whakapae a Te Wharepora Hauora "kihai te tokorua rā i te paku mohio ki ngā ahuatanga, me te kaha whakamā ka kaha pēhi i ngā pārurenga pāwhera, me ngā whānau hoki e noho taumaha ana nā ngā raru tūkino whānau."