Kaupapa: Teina Pora

Kua whakaaetia tonutia a Pora ki te toro atu ki te kāinga

Aroha Treacher

E noho matangurunguru ana a Teina Pora nā te kore whakaae a te poari tuku here kia whakawāteatia ia i te whare herehere mō te wā tekau-mā-rua.

Ko te take i pēnei ai, ko tā Pora rūkahu atu ki te poari mō te wā i whai whakaaetanga tuku poto ia kia toro ki te kāinga o tana tamahine, heoi, ka moe kē ki tētahi kairau.

Nōna e mauheretia ana, e iwa ngā whakaaetanga tuku-poto kua riro i a Pora i te poari tukuhere.

I te toronga pēnei kātahi nei ka hipa, i toro ia ki te kāinga o tana tamahine, ā, tōna tikanga ka noho piri ki tōna kaitiaki, heoi, i moe kē ia ki tētahi kairau, ka rūkahu hoki ki te poari mō taua mahi.

I tā te poari whiu tonu i ngā patai ki a Pora, ka whākī ia i tōna hara.  Ka mutu, nā taua tinihanga i whakapono ai te poari, ki te whakawāteatia a Pora i te whare herehere, ka kore ia e ū ki ngā ture tukuhere.

Ki tā te roia, i meatia a Pora ki tētahi ruma me tōna tekau mā rua tāngata e tauhou katoa ana ki a ia, nā whai anō te whakamā ki te kōrero mō tēnei take tapu ki a ia.

Mai i taua whawhatinga ture, kua whakaaetia tonutia a Pora ki te toro atu ki te kāinga, ā, he whitu tekau mā rua hoara te roa o ētahi o aua toronga, otira, kāore he raru i toko ake.

E manako ana tōna roia, nā kona ka anga pai te titiro a te poari tukuhere ki a ia, ka tae ana ki tana whakawākanga tukuhere hei te ono marama.