Kua urupare te kaihaka ki ngā whakaahua i rawekehia ki runga i te ipurangi

Kua tuku whakapāhā te Reo Irirangi o More FM mō tā rātau tuari atu i ngā whakaahua raweke o ngā kaihaka o Te Whānau-a-Apanui.

Hei tā rātau "Nei rā te whakapāhā nui mō tā mātau tuari atu i ēnei whakaahua". Hei tā rātau anō "Kua whakaritea ētahi panonitanga hei whakawhanake i ngā mahi tīpako i ngā kaupapa ipurangi ā ao"

i rawekehia ngā whakaahua o Tiare Tawera me Rawiri Waititi, ā, ko ō rātau māhunga i huri hei puku, ko ō rātau tinana i whakarerekētia hei mea whakakatakata mā te marea.

E ai ki a Tawera, i tana kitenga tuatahi i ēnei whakaahua, he hātekēhi ki a ia, heoi, whai muri i tana kōrero ki a Waititi me tana kī mai he nui te pāpouri o āna tamariki i ngā whakaahua nei, i rerekē ōna whakaaro.

Ko tā Willie Te Aho o Aotearoa Kaha Haka Limited, he pōrangi ngā kaimahi o More FM.

Kua tangohia katoatia mai te pōhi i tāpirihia ki te whārangi pukamata a More FM, heoi, e horapa haere tonu ana ēnei whakaahua ki runga o pukamata.

Kei a Hone-Haunui Rapana te roanga ake o ngā whakamārama mō tēnei kaupapa a te pō nei hei te 5:30pm.